Քաղաքականություն
01.12.2023 | 22:13
ՌԴ Տուլայի մարզում Wildberries առցանց առևտի ընկերության պահեստում աշխատակիցներին ծանուցագրերի բաժանման հերթական դեպքն է արձանագրվել։ Meduza-ի փոխանցմամբ՝ ոստիկանները ժամանել են Ալեքսին քաղաքի պահեստ, ստուգել ընկերության աշխատակիցների փաստաթղթերը։
Ոստիկանությունն առաջին հերթին հետաքրքրված է եղել զորակոչի ենթակա ժամկետային զինծառայողներով, ինչպես նաև վերջերս ռուսական անձնագիր ստացած անձանցով։
«Ստուգումից հետո մի քանի միկրոավտոբուսներ շուկայի աշխատակիցներով դուրս են եկել պահեստից»,- գրում է Baza տելեգրամ ալիքը։
Shot տելեգրամի ալիքի փոխանցմամբ էլ՝ տասը հոգու ոստիկանները բերման են ենթարկել։
Wildberries-ի մամուլի ծառայությունը միջադեպն անվանել է «փաստաթղթերի սովորական ստուգում զինվորական ծառայության զորակոչի շրջանակում»։ Ընկերությունը նշում է, որ այս ստուգումը որևէ կերպ չի ազդել պահեստի շահագործման վրա։
Հիշեցնենք, որ օրերս էլ ոստիկանները ստուգում էին իրականացրել Մոսկվայի մարզի Էլեկտրոստալ քաղաքում ընկերության տեսակավորման կենտրոնում՝ միգրանտների շրջանում։Ոստիկանությունը ստուգել էր պահեստի աշխատակիցների անձնագրերն ու դրանցում զինվորական ծառայություն անցնելու նշանների առկայությունը։ Որոշ աշխատակիցների զինկոմիսարիատներ ներկայանալու ծանուցագրեր էին տրվել։
Էմմա Չոբանյան
