Քաղաքական հալածանք չէի ասի՝ հետապնդում. Վարդան Բոստանջյանը Ռոբերտ Քոչարյանի կալանավորման մասին. ՏԵՍԱՆՅՈՒԹ

«Ռոբերտ Քոչարյանին կալանավորելու կարիք չկար»,- վստահ է ծառուկյանական պատգամավոր Վարդան Բոստանջյանը: Ըստ նրա՜ «կարիք չկար կալանավորել, թեկուզ հենց պայմանավորված էն հանգամանքով, որ գտնվելով հանրապետությունից դուրս ինքը ներկայացավ, և բացի էդ էլ, ինքը ելույթ ունեցավ, ասեց՝ որտե՞ղ պետք է փախչի»։

Պատգամավորն անկաշկանդ է այն տեսակետում, որ նախկին նախագահի հանդեպ տեղի ունեցածն ամենևին էլ դատական իշխանության անկախություն չի նշանակում։

«Էթիկայից ելնելով պետք է ես ասեմ, ոչ էդպիսի բան չկա, բայց իրականում իրավունք ունես մտածելու, որ հրահանգ է կատարվել»,- ասում է «Ծառուկյան» խմբակցության անդամը։

Այսօր նրան մտահոգում է այն, որ Ռոբերտ Քոչարյանի կալանավորմամբ Արցախի ոտքի տակից հող է փախել։ Պարոն Բոստանջյանը հասկանում է, որ «Մարտի 1»-ը պետք է բացահայտվի և մեղավորներն էլ պիտի պատասխան տան։ «Բայց բոլոր պարագաներում մենք կարող ենք դա անել այնպես, որ հանկարծ մեր հակամարտող կողմերը, թշնամիներն ուրախանալու բան չունենան»,- հույս ունի Վարդան Բոստանջյանը։

Պատգամավորը չի բացառում, որ արցախցիների արժանապատվությունը կարող է խոցվել այն փաստից, որ Հայաստանում ձերբակալվել է իրենց Ազգային հերոսը։ Նա կասկածներ ունի նաև, որ երկրորդ նախագահի հանդեպ քննչական ծառայությունը ազնիվ չի եղել։ «Բոլոր դեպքերում տհաճ բան է տեղի ունեցել, եթե հրավիրվում է վկա ու անմիջապես ներկայացվում է մեղադրանք, հիմա ոնց կուզենան լսողները թող հասկանան»,- համարձակորեն պնդում է նա։

Տեղի ունեցածը նա չի շտապի անվանել քաղաքական հալածանք․ «Հալածանք չասենք, հետապնդում»։

Որտե՞ղ է հետապնդումը, եթե գործը հարուցված է «Մարտի 1»-ի սահմանադրական կարգը տապալելու հոդվածով։ «Գուցե այդպես է,-չի բացառում պատգամավորը,- բայց այդ դեպքում կալանավորելը պարտադիր չէր»։

«Եթե կալանավորումը պարտադիր ինստիտուտ է ներկայանում էստեղ, էն էլ հանրապետության նախագահի կտրվածքով, ուրեմն կարող ես մտածել՝ արդյոք սա հետապնդում չէ՞»,- չի նահանջում պարոն Բոստանջյանը։

«Ծառուկյան» խմբակցությունն առայժմ որևէ հայտարարություն չի ընդունել երկրորդ նախագահի կալանավորելու առնչությամբ։ Պարոն Բոստանջյանը չի բացառում, որ դաշինքն առաջիկայում կհավաքվի և կքննարկի իր վերաբերմունքը Ռոբերտ Քոչարյանի հետ տեղի ունեցածի կապակցությամբ։

Մհեր Արշակյան