02.04.2026 | 10:38
Այց «Եռաբլուր»՝ քառօրյա պատերազմի տարելիցի կապակցությամբ. ՈՒՂԻՂ
Վրաստանի ընդդիմությունը քննադատել է երկրի ԱԳ նախարարին՝ ԵԱՀԿ գագաթնաժողովը չբոյկոտելու համար
Քաղաքականություն
30.11.2023 | 19:53
Վրացական ընդդիմությունը բողոքում է այն փաստի դեմ, որ Վրաստանի արտգործնախարար Իլիա Դարչիաշվիլին մասնակցում է Հյուսիսային Մակեդոնիայի Սկոպյեում անցկացվող ԵԱՀԿ գագաթնաժողովին, որին հրավիրված է նաև Ռուսաստանի արտգործնախարար Սերգեյ Լավրովը։ Ընդդիմադիրները կարծում են, որ Թբիլիսին պետք է հետևեր «քաղաքակիրթ» երկրների օրինակին և բոյկոտեր հանդիպումը, գրում է VOA-ն։
«Մինչ քաղաքակիրթ պետությունները, ովքեր գիտեն, թե ինչ է ռուսական օկուպացիան, հստակ դիրքորոշում ունեն, Վրաստանի արտգործնախարար Դարչիաշվիլին մտադիր չէ բոյկոտ հայտարարել։ Սա ևս մեկ անգամ հաստատում է, որ այս կառավարությունը ծառայում է Ռուսաստանին և շարունակում է ոչնչացնել Վրաստանի արտաքին քաղաքականությունն ու միջազգային հեղինակությունը»,- հայտարարել է ընդդիմադիր «Լելո» կուսակցությունը։
Ի պատասխան ընդդիմության քննադատության՝ իշխող «Վրացական երազանք»-ը նշել է, որ ԵԱՀԿ նախարարական հանդիպմանը մասնակցում են ԱՄՆ պետքարտուղար էնթոնի Բլինքենը և Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը։
«Հաշվի առնելով, որ մենք պետք է օգտագործենք ցանկացած ձևաչափ՝ պաշտպանելու մեր ազգային շահերը, երբ Բլինքենն ու Բորելը մասնակցում են գագաթնաժողովին, Վրաստանի ԱԳՆ ղեկավարի բոյկոտն առնվազն անհասկանալի կլինի»,- ասել է իշխող կուսակցության նախագահ Իրակլի Կոբախիձեն։
Ինչ վերաբերում է բալթյան երկրների կողմից ԵԱՀԿ նախարարական նիստը բոյկոտելուն, «Վրացական երազանքը» նրանց մեղադրել է «երկակի ստանդարտների» մեջ և նշել, որ, ըստ պաշտոնական վիճակագրության, Լատվիան և Լիտվան 2023 թվականին դարձել են Ռուսաստան գինիների ամենամեծ մատակարարները։
