Էրդողանի որդու ընկերության նավերն Իսրայելում բեռնափոխադրումներ են իրականացրել Գազայում հակամարտության ամենաթեժ պահերին

Թուրքիայի նախագահ Ռեջեփ Թայիփ Էրդողանի ավագ որդին՝ Բուրաք Էրդողանը, կարող է լինել բեռնափոխադրող ընկերության սեփականատերը, որն ապրանքներ է բեռնել Իսրայելում հոկտեմբերին՝ հակամարտության թեժ պահին՝ չնայած Թուրքիայի ղեկավարի հակաիսրայելական հռետորաբանությանը։ Այս մասին հայտնել է հետաքննող թուրք լրագրող Մեթին Ջիհանը՝ վկայակոչելով Ստամբուլի Առևտրի պալատի տվյալները, գրում է Turkish Minute-ը։

Manta Denizcilik ընկերությանը պատկանող Halit Yıldırım նավը հոկտեմբերի 11-ին մեկնել է Իսքենդերուն նավահանգստից, որը շահագործվում է Էրդողանի հետ կապված Limak բիզնես խմբի կողմից և հոկտեմբերի 14-ին ժամանել Իսրայելի Աշդոդ նավահանգիստ: Ապրանքը բեռնելուց հետո այն հոկտեմբերի 18-ին նավարկել է դեպի Ֆլորիդա, գրել է Մեթին Ջիհանը -ի իր էջում։

Manta Denizcilik-ը պատկանում է Մերթ Չեթինքայային, որը նաև Բուրաք Էրդողանի հետ MB Denizcilik բեռնափոխադրող ընկերության համասեփականատերն է։ Թեև Բուրակը պաշտոնապես ընկերության սեփականատերը չէ, նախագահ Էրդողանի քննադատները ենթադրում են, որ դա այդպես է, քանի որ թուրք առաջնորդը մեղադրվում է իր ընտանիքի կամ ընկերների կողմից ստեղծած խոշոր ընկերությունների միջոցով ապօրինի հարստություն դիզելու մեջ։

Բուրաքի նավագնացության բիզնեսը քննադատության է ենթարկվել Էրդողանի՝ «Արդարություն և զարգացում» կուսակցության կառավարման առաջին տարիներից: Այն ժամանակ վարչապետ Էրդողանն իր որդուն պատկանող նավերն անվանել է «նավակներ»՝ պատասխանելով հարցին՝ արդյո՞ք բարոյական է իր որդու կողմից նման շահութաբեր առևտրով զբաղվելը Թուրքիան կառավարելիս։

Հոկտեմբերի 7-ին Իսրայելի վրա ՀԱՄԱՍ-ի հարձակումից հետո՝ հակամարտության սրման առաջին օրերին Էրդողանը, որը երկար ժամանակ իրեն մուսուլմանական աշխարհում ներկայացնում էր որպես պաղեստինցիների իրավունքների պաշտպան և Իսրայելի խիստ քննադատ, անսովոր չափավոր էր և նույնիսկ առաջարկում էր միջնորդ հանդիսանալ կողմերի միջև։ Այնուամենայնիվ, երբ հասարակության վրդովմունքն աճեց Գազայում զոհերի թվի աճին զուգահեռ, Թուրքիայի նախագահը կոշտ հռետորաբանության անցավ։

Լրագրողի հետաքննությունը թուրքերին ցույց է տալիս, որ Էրդողանը, որն Իսրայելի սուր քննադատ է հանդես գալիս, կարող է իսրայելական նավահանգիստների հետ կապված ծովային առևտրի շահառու լինել:

«Հոկտեմբերի 17-ին, մինչ նախագահ Էրդողանը դատապարտում էր Իսրայելին պաղեստինյան հիվանդանոցը ռմբակոծելու համար, նրա որդու՝ Բուրաք Էրդողանի ընկերությունն ապրանքներ էր բեռնում Իսրայելի նավահանգստում։ Հոկտեմբերի 28-ին, մինչ Էրդողանը կրկին քննադատում էր Իսրայելին և կոչ էր անում բողոքի ակցիաներ կազմակերպել, նրա որդու նավն անցել է Ջիբրալթարի նեղուցը»,- X-ում նշել է լրագրողը։

Էմմա Չոբանյան