Չինաստանի մանկական հիվանդանոցներում կոլապս է․ երեխաների շրջանում վիրուսային հիվանությունների կտրուկ աճ է գրանցվել

Չինաստանում աշնան կեսերին սկսված սեզոնային շնչառական հիվանդությունների ալիքը անսպասելիորեն բարձր է եղել, հատկապես՝ երեխաների շրջանում։ Նախորդ տարիների միջին ցուցանիշից մոտ երկու անգամ ավելի շատ դեպքեր են գրանցվել, գրում է Կոմերսանտը։

Քաղաքի մանկական հիվանդանոցների և մանկաբուժական բաժանմունքների համակարգը ստիպված է լրացուցիչ տարածքներ փնտրել ինչպես ստացիոնար, այնպես էլ ամբուլատոր ընդունելությունների և ընթացակարգերի համար: Չինաստանի իշխանությունները քաղաքացիներին կոչ են անում հանգստություն պահպանել և բռնկումը վերագրել հակաքովիդային սահմանափակումների վերացմանը։

Չինաստանում սեզոնային հիվանդությունների առաջին իսկ ամիսը բարդ է եղել հունվարին հակաքովիդային սահմանափակումները հանելուց հետո։ Չինական ԶԼՄ-ների համաձայն՝ հիվանդությունների թիվը երկու անգամ ավելացել է մինչհամաճարակային ցուցանիշների համեմատ։

Ավելին, եթե հոկտեմբերին ավելի շատ են եղել Mycoplasma pneumoniae բակտերիայից առաջացած թոքաբորբի դեպքերը, ապա նոյեմբերի կեսերից կտրուկ աճել են գրիպի և շնչառական այլ հիվանդությունների դեպքերը։ Իշխանությունները շեշտում են, որ նոր հարուցիչներ չկան, մարդիկ վարակվում են վաղուց հայտնի վիրուսներով և բակտերիաներով, պարզապես ավելի հեշտ են վարակվում։ Ընդ որում, հիմա ամենից հաճախ հիվանդանում են երեխաներն ու երիտասարդները։

The Global Times-ը վերլուծել է Պեկինի մի քանի հիվանդանոցների ամբուլատոր և ստացիոնար բաժանմունքներում գրիպի և թոքաբորբի ախտանիշներով երիտասարդ հիվանդների ընդունման իրավիճակը: Պարբերականի համաձայն՝ մանկաբույժների ընդունելության համար գրանցումն իրականացվում է մեկ շաբաթ առաջ, իսկ տեսակցությունների թիվը ռեկորդներ է գերազանցում։

Պեկինի մանկաբուժության ինստիտուտի մանկական հիվանդանոցում մեկ օրում ընդունված հիվանդների առավելագույն թիվը կազմել է 9,378։

Ըստ The Guardian-ի՝ չինական սոցիալական ցանցերը հրապարակում են Հեբեյ նահանգի հիվանդանոցներից մեկում գերծանրաբեռնված շտապ օգնության սենյակների և միջանցքների լուսանկարներ և տեսանյութեր: Մյուս մարզերում հաղորդում են դասարանների կամ ամբողջ դպրոցների փակման մասին՝ դպրոցականների շրջանում վարակվածության բարձր մակարդակի պատճառով:

Մահճակալների պակասի խնդիրը լուծելու համար քաղաքային մանկական հիվանդանոցները լրացուցիչ սենյակներ են բացում հիվանդներին ընդունելու և տեղավորելու համար։