07.10.2026 | 15:26
«Ռոսատոմը» հաստատել է՝ հայկական ԱԷԿ-ը մինչև 2031 թվականը պատրաստ կլինի անվտանգ շահագործման
Ղազախստանի բնակիչը «Վագներ»-ի կազմում Ուկրաինայում պատերազմին մասնակցելու համար դատապարտվել է 6 տարի 8 ամիս ժամկետով ազատազրկման
Քաղաքականություն
29.11.2023 | 23:00
Ղազախստանի Կարագանդայի քաղաքային դատարանը Տոպար գյուղի 34-ամյա բնակիչ Ալեքսեյ Շոմպոլովին դատապարտել է 6 տարի 8 ամիս ժամկետով ազատազրկման՝ ուկրաինական պատերազմին մասնակցելու համար, գրում է DW-ի ռուսական ծառայությունը։
Հետաքննության տվյալներով՝ Շոմպոլովը 2023 թվականի մայիսին կռվել է Ուկրաինայում ՌԴ-ի կողմից մասնավոր ռազմական «Վագներ» խմբավորման կազմում։ Նա «Վագներ»-ի մասին տեղեկացել է դրանից երկու ամիս առաջ՝ սոցիալական ցանցում տեսնելով Ռուսաստանում բարձր վարձատրվող աշխատանքի մասին հայտարարություն։ Տղամարդուն տեղեկացրել են, որ խոսքը «Վագներ»-ի շարքերը համալրելու մասին է, նա համաձայնել է և գնացել Ռուսաստանի Դաշնությունում խմբավորման ուսումնամարզական հավաքին։ Մարզվելուց հետո նա հատել է Ուկրաինայի սահմանը, մասնակցել Բախմուտի մոտ տեղի ունեցած մարտերին, սակայն երկու շաբաթ չանցած վիրավորվել և դուրս գրվել։
Շոմպոլովը ձերբակալվել է Ղազախստան վերադառնալուց անմիջապես հետո։ Դատարանը տղամարդուն մեղավոր է ճանաչել վարձկանության մեջ, ինչպես նաև կարգադրել է բռնագրավել «Վագներ»-ից ստացված ավելի քան 205 հազար ռուբլի։ Դատարանը տղամարդու գործողությունները որակել է որպես մասնակցություն պատերազմական գործողություններին՝ «ուղղված սահմանադրական կարգը տապալելուն կամ պետության տարածքային ամբողջականությունը խախտելուն»։
Շոմպոլովը զղջացել է և պատերազմին իր մասնակցությունը պատճառաբանել փողի կարիքով, քանի որ գործազուրկ է։ Նա իրեն չզրկել ազատությունից և վերաքննիչ բողոք է ներկայացրել դատավճռի դեմ, սակայն վերադաս դատարանն այն թողել է ուժի մեջ։
Հավելենք, որ Ռուսաստանում մոբիլիզացիայի հայտարարման, ինչպես նաև օրենքների ընդունման ֆոնին, որոնք այլ երկրների բնակիչներին թույլ են տալիս ստանալ Ռուսաստանի քաղաքացիություն՝ ՌԴ ՊՆ-ի հետ պայմանագիր կնքելու դիմաց, ԱՊՀ մի շարք երկրների դիվանագիտական ներկայացուցչություններ նախազգուշացրել են իրենց քաղաքացիներին նման պայմաններում Ուկրաինայի դեմ Ռուսաստանի պատերազմին մասնակցելու անթույլատրելիության մասին։
Ղազախստանի, Ղրղզստանի և Ուզբեկստանի օրենսդրությունը նման գործողությունները համարում է վարձկանություն, որը համարվում է քրեական հանցագործություն։
Էմմա Չոբանյան
