Իլոն Մասկն Իսրայելում է․ նա հանդիպել է Բենիամին Նեթանյահուին

Ամերիկացի գործարար Իլոն Մասկը, որը քննադատության է ենթարկվում իրեն պատկանող X սոցիալական հարթակում հակասեմականության տարածման մեղադրանքների պատճառով, այսօր այցելել է Իսրայել։ Նա շրջել է կիբուցում, որն անցյալ ամիս հարձակման էր ենթարկվել ՀԱՄԱՍ-ի զինյալների կողմից, գրում է AP-ին, որին վկայակոչում է Al Arabiya-ն։

Ամերիկացի միլիարդատերն ու Իսրայելի վարչապետ Բենիամին Նեթանյահուն շրջել են կիբուցում, ուր ներխուժել էին ՀԱՄԱՍ-ի զինյալները հոկտեմբերի 7-ին: Մասկն անվտանգության աշխատակիցների ուղեկցությամբ իր հեռախոսով լուսանկարել կամ տեսանկարահանել է ավերածությունները: Նա պետք է հանդիպի նաև Իսրայելի նախագահ Իցհակ Հերցոգին և պաշտպանության նախկին նախարար Բենի Գանցին, որն այժմ պատերազմի հատուկ կաբինետի մաս է կազմում:

Իսրայելի կառավարության խոսնակ Էյլոն Լևին հրաժարվել է ասել՝ Մասկին հրավիրե՞լ են, թե՞ նա ինքնուրույն է ժամանել։ X-ը չի պատասխանել լրատվամիջոցի մեկնաբանության խնդրանքին:

Մասկը մեղադրվում է սոցցանցի իր հարթակում հակասեմական հաղորդագրությունները հանդուրժելու մեջ։ X-ի բովանդակությունը մեծ ուշադրության է արժանացել Իսրայելի և ՀԱՄԱՍ-ի միջև պատերազմի սկսվելուց հետո:

Մի շարք խոշոր ընկերություններ, այդ թվում՝ Disney-ը և IBM-ը, որոշել են դադարեցնել գովազդը հարթակում այն ​​բանից հետո, երբ Media Matters-ի կողմից հրապարակված զեկույցում ասվում էր, որ գովազդները հայտնվում են նացիստամետ բովանդակության կողքին, իսկ Մասկն աջակցում  է հակասեմական դավադրության տեսություններին։

Այս ամիս Մասկը պատասխանել էր X-ի մի օգտատիրոջ, որը հրեաներին մեղադրել էր սպիտակամորթներին ատելու և հակասեմականության հանդեպ անտարբեր լինելու մեջ՝ ասելով. «Դուք ճշմարտությունն եք ասում»:

Էմմա Չոբանյան