ՌԴ-ում գնաճը շարունակում է դատարկել ռուսների դրամապանակները․ անդրադարձ

Մոսկվայի սուպերմարկետների դարակաշարերը լի են բանջարեղենով ու մրգերով, պանիրով ու մսամթերքով։ Բայց շատ գնորդներ անցնում են լայն տեսականու կողքով՝ հազիվ նայելով գնապիտակներին։ Գնաճը շարունակում է դատարկել ռուսների դրամապանակները։ Այս մասին ասվում է Euronews-ի անդրադարձում։

Փորձելով վերահսկել գնաճը և կայունացնել ռուբլու փոխարժեքը՝ Ռուսաստանի Կենտրոնական բանկն այս տարի չորս անգամ բարձրացրել է վարկավորման հիմնական տոկոսադրույքը։ Երկրի տնտեսությունը բախվում է Ուկրաինայի պատերազմի և Արևմուտքի հակառուսական պատժամիջոցների հետևանքներին։

Վերջին անգամ ԿԲ-ն տոկոսադրույքը բարձրացրել է հոկտեմբերին 200 բազիսային կետով՝ մինչև 15%։ Ընդ որում, այս տարվա սկզբին այն կիսով չափ էր։ Ռուսաստանի դրամավարկային քաղաքականության համար պատասխանատու գլխավոր կազմակերպության ներկայացուցիչները հայտնել են, որ անհանգստացած են գների աճով, որոնք տարեկան կտրվածքով կազմում են մոտ 12%: Բանկը նաև նվազեցրել է գնաճի իր կանխատեսումը մինչև 7,5% 2023 և հաջորդ տարվա համար:

Նոյեմբերի 1-ին հրապարակված Ռոսստատի տվյալները ցույց են տալիս որոշ պարենային ապրանքների գների կտրուկ թռիչք՝ համեմատած 2022 թվականի հետ․ կաղամբի համար՝ 74%-ով, նարնջինը՝ 72%-ով, վարունգինը՝ 47%-ով։

Վերջերս Պետդուման հաստատել է 2024-2026 թվականների բյուջեն, որը ներառում է պաշտպանական ծախսերի համար նախատեսված ռեկորդային գումար։ Լատվիայում բնակվող ռուսաստանցի ֆինանսական վերլուծաբան Մաքսիմ Բլանտի կարծիքով՝ դա գների հետագա աճ է կանխատեսում։