Թուրքիայում իսրայելական ապրանքանիշերը բոյկոտելու արշավը շարունակվում է

Թուրքիայում սկսվել է իսրայելական ապրանքանիշերի դեմ ամենամեծ բոյկոտի արշավը, գրում է թուրքական Yeni Akit թերթը։

«Թուրքիայում սկսվել է պատմության մեջ ամենամեծ բոյկոտի արշավը։ Այս որոշմանն ուղղված աջակցությունը, որն ընդունվել է Պաղեստինի վրա Իսրայելի հարձակումներից հետո, աճում է: Ցուցակում ներառված են իսրայելական ապրանքանիշեր ու բրենդներ, որոնք աջակցում են Իսրայելին»,- գրում է պարբերականը։

Ըստ հրապարակման՝ հարյուրավոր ապրանքանիշեր, այդ թվում՝ իսրայելական ընկերությունների, վաճառվում են թուրքական շուկաներում։

Հոկտեմբերի 7-ին Իսրայելն աննախադեպ ծավալի հրթիռային հարձակման է ենթարկվել Գազայի հատվածից «Ալ-Աքսա ջրհեղեղ» գործողության շրջանակում, որը հայտարարել է պաղեստինյան ՀԱՄԱՍ շարժման ռազմական թևը։ Դրանից հետո կազմակերպության մարտիկները մտել են հարավային Իսրայելի սահմանային շրջաններ, որտեղ կրակ են բացել ինչպես զինվորականների, այնպես էլ քաղաքացիական անձանց վրա, ինչպես նաև ավելի քան 200 պատանդ վերցրել։

Ի պատասխան՝ Իսրայելի պաշտպանության ուժերը Գազայի հատվածում ՀԱՄԱՍ-ի դեմ սկսել են «Երկաթե սրեր» գործողությունը։ Մի քանի օրվա ընթացքում իսրայելացի զինվորականները վերահսկողության տակ վերցրեցին Գազայի հետ սահմանի մոտ գտնվող բոլոր բնակեցված տարածքները և սկսեցին օդային հարվածներ հասցնել այդ գոտու թիրախներին, այդ թվում՝ քաղաքացիական անձանց: Իսրայելը նաև հայտարարել է Գազայի հատվածի ամբողջական շրջափակման մասին՝ դադարեցվել է ջրի, սննդի, էլեկտրաէներգիայի, դեղորայքի և վառելիքի մատակարարումը։

Այսօր ՀԱՄԱՍ-ի և Իսրայելի միջև քառօրյա մարդասիրական զինադադար է մեկնարկել՝ պատանդներին ազատ արձակելու ու դեպի հատված մարդասիրական օգնություն մատակարարելու համար։