14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Զավթված մայթը. ինչ կապ ունի Խաչատուր Սուքիասյանը. ՏԵՍԱՆՅՈՒԹ
Քաղաքականություն
23.11.2023 | 21:26
«Ռոսիա մոլ»-ին հարող այս տարածքում մեքենայի անիվների տակ հայտնվելու հավանականությունը փոքր չէ՝ նեղլիկ անցումներ և չդադարող մեքենաների հոսք։
Երևանի քաղաքապետարանից Factor TV-ին հայտնեցին, որ այս տարածքը համայնքապատկան է՝ ո՛չ վարձակալությամբ, ո՛չ օգտագործման իրավունքով որևէ մեկին տրված չէ։ Այդ դեպքում ովքե՞ր են անձինք, որոնք տարածքում համակարգում են մեքենաների կայանումն ու անգամ վճարներ գանձում։
Կայանվող մեքենաների վարորդներին ակտիվորեն ցուցումներ տվող աշխատակիցը նման փութաջանություն չի դրսևորում մեր հարցերին պատասխանելիս։
Ապօրինաբար որպես ավտոկայանատեղի ծառայող մայթը գտնվում է ԱԺ ՔՊ-ական պատգամավոր, խոշոր գործարար Խաչատուր Սուքիասյանին և ընտանիքին պատկանող «Ռոսիա մոլ» տոնավաճառի անմիջական հարևանությամբ։ Factor TV-ի տեսախցիկը տարածքում արձանագրեց գրություններ այն մասին, որ կայանատեղին նախատեսված է միայն տոնավաճառի համար։ Factor TV-ն ԱԺ-ում Խաչատուր Սուքիասյանից հետաքրքրվեց՝ արդյո՞ք առնչություն ունի այս ավտոկայանատեղիի հետ։
«Ես պատգամավոր եմ, խոշոր սեփականատեր եմ, ունեմ բիզնեսներ, բայց չեմ զբաղվում կառավարմամբ, չեմ կարող ասել՝ ինչ են վարձում, ինչ չեն վարձում»,- նշեց նա։
Մեզ հաջողվեց ձեռք բերել կայանատեղիի աշխատողի կողմից վարորդներին տրվող ՀԴՄ կտրոնը։ Ըստ այդմ՝ պարզ դարձավ, որ տարածքում ծառայություններ է մատուցում «Նարեկ» ՍՊԸ-ն։ Զանգահարեցինք իրավաբանական անձանց ռեգիստրում ընկերության փաստաթղթերում նշված հեռախոսահամարով։
Իսկ ահա իրավաբանական անձանց պետական ռեգիստրում նշված է, որ «Նարեկ» ՍՊԸ-ն պատկանում է Սուքիասյաններին, այդ թվում՝ Խաչատուր Սուքիասյանին։ Նրա մասնաբաժինը կազմում է 25 տոկոս, եղբայրներինը՝ Էդուարդ և Սարիբեկ Սուքիասյաններինը, համապատասխանաբար, 37 և 38 տոկոս։
Տարածքում այլ արատավոր երևույթ էլ արձանագրեցինք։ Մեքենաները որոշ դեպքերում կայանում են նաև այն հատվածներում, որոնք նախատեսված են կանաչապատման համար։
Ինչո՞ւ է Երևանի քաղաքապետարանը հանդուրժում Սուքիասյանների կողմից մայթերն ավտոկայանատեղիի համար օգտագործելու այս գործելաոճը։ Երևանի քաղաքապետարանի մամուլի խոսնակ Հայկ Կոստանյանը Factor TV-ին փոխանցեց, որ համայնքը խնդիրը լուծելու որևէ լծակ չունի։ Արդյունքում ստացվում է, որ հանրային տարածքը բիզնես նպատակներով օգտագործվում է իշխանության առանցքային ներկայացուցիչներից մեկի՝ Խաչատուր Սուքիասյանի կողմից։
Մանրամասները՝ տեսանյութում։
Նարեկ Կիրակոսյան
