15.01.2026 | 12:36
Նոր պատվաստանյութեր ենք ներդրել վերջին տարիներին. Ավանեսյան․ ՏԵՍԱՆՅՈՒԹ
G7-ի երկրները դատապարտել են Հյուսիսային Կորեայի գործողությունները
Քաղաքականություն
23.11.2023 | 21:15
Մեծ յոթնյակի (G7) երկրների արտաքին քաղաքական գերատեսչությունների ղեկավարները դատապարտել են Փհենյանի գործողությունները, որը նախօրեին հրթիռ է արձակել տիեզերք՝ չնայած խիստ սահմանափակումներին, ինչպես նաև զենք է փոխանցել Ռուսաստանին՝ Ուկրաինայի դեմ պատերազմի համար։ G7-ի նախարարների համապատասխան համատեղ հայտարարությունը հրապարակվել է ԱՄՆ Պետքարտուղարության կողմից։
Հայտարարության մեջ, մասնավորապես, ասվում է, որ բալիստիկ հրթիռների տեխնոլոգիայի կիրառմամբ ցանկացած արձակում, եթե անգամ այն բնութագրվում է որպես ռազմական հետախուզական արբանյակ, «ՄԱԿ-ի Անվտանգության խորհրդի համապատասխան բանաձևերի ակնհայտ, կոպտագույն խախտում է»։
Բացի այդ, G7-ն ընդգծել է, որ ԿԺԴՀ-ն շարունակում է միջուկային զենք ստեղծել, ինչը հակասում է ՄԱԿ-ի որոշումներին։
G7-ը նաև դատապարտել է հյուսիսկորեական զենքի մատակարարումը Ռուսաստանին, որը նախատեսվում է օգտագործել Ուկրաինայի դեմ պատերազմում։
«Մենք Հյուսիսային Կորեային և Ռուսաստանին կոչ ենք անում կատարել ՄԱԿ-ի Անվտանգության խորհրդի այս բանաձևերը և անհապաղ դադարեցնել ցանկացած նման գործունեություն»,- ասվում է հայտարարության մեջ։
G7-ն աշխարհին կոչ է արել «արագ, միասնաբար և վճռականորեն» արձագանքել։ Հյուսիսային Կորեան հայտնել է բալիստիկ հրթիռի հաջող արձակման մասին, որի վրա կա լրտեսական արբանյակ։ Հյուսիսային Կորեան հայտարարել է միջին հեռահարության նոր բալիստիկ հրթիռների՝ պինդ վառելիքով շարժիչների հաջող փորձարկումների մասին։
