02.11.2024 | 11:21
Նավթի գները նվազել են
Ուկրաինայի վերականգնման համար անհրաժեշտ է ավելի քան 400 մլրդ դոլար․ ՄԱԿ
Քաղաքականություն
22.11.2023 | 22:38
ՄԱԿ-ի գլխավոր քարտուղարի օգնական Միրոսլավ Էնչին հայտարարել է, որ պատերազմից հետո Ուկրաինայի վերակառուցումը, ըստ նախնական հաշվարկների, կարժենա ավելի քան 400 միլիարդ դոլար: Այս մասին նա հայտարարել է ՄԱԿ-ի Անվտանգության խորհրդի նիստում, գրում է DW-ի ռուսական ծառայությունը։
Էնչին մտավախություն է հայտնել, որ քաղաքացիական ենթակառուցվածքների և քաղաքացիական անձանց վրա շարունակվող հարձակումները կարող են ուժեղանալ ցուրտ եղանակի սկսվելուն պես: Նա նշել է, որ նոյեմբերի 11-ին Ռուսաստանը վերսկսել է Կիևի հրետակոծությունը և շարունակում է հարձակումներն ուկրաինական այլ քաղաքների ուղղությամբ։
«Այս պատերազմի վերջնական կորուստները, ամենայն հավանականությամբ, շատ ավելի մեծ կլինեն, քանի որ բռնությանը վերջ տալու որևէ նշան չկա»,- ասել է ՄԱԿ պաշտոնյան։
Նա նշել է, որ հիմա Ուկրաինան ակտիվ իրագործում է ձմեռվա արձագանքման պլանը, որը մշակվել է ՄԱԿ-ի և նրա գործընկերների կողմից տեղական իշխանությունների հետ համատեղ։ Պաշտոնյայի խոսքով՝ ևս 435 մլն դոլար է անհրաժեշտ տները վերանորոգելու, ձմեռային հագուստ, ջեռուցման սարքեր, վառելիք գնելու և 1,7 մլն մարդու կենտրոնացված ջրամատակարարման ու ջեռուցման համակարգերի վերանորոգման նյութեր մատակարարելու համար։
Էնչին նաև հայտարարել է, որ 2023 թվականի համար Ուկրաինայի մարդասիրական արձագանքման ներկայիս ծրագիրը ֆինանսավորվում է ընդամենը 54 տոկոսով։ Այս տարի ՄԱԿ-ի հումանիտար օգնությունը երկրում ստացել է ավելի քան 11 մլն մարդ։ Էնչին նշել է, որ օգնության կարիք ունեցող ևս մոտ 4 միլիոն ուկրաինացիներ գտնվում են Ռուսաստանի կողմից վերահսկվող տարածքներում, և նրանց հետ կապ հաստատել հնարավոր չէ՝ այդ տարածքներ մուտքի բացակայության պատճառով:
Էմմա Չոբանյան
