Հրանտ Դինքին կյանքից զրկած Օգյուն Սամասթի ազատ արձակումը Թուրքիայի ընդդիմության և իրավապաշտպանների քննադատությանն է արժանացել

Պոլսահայ լրագրող, «Ակոս» թերթի գլխավոր խմբագիր Հրանտ Դինքին սպանած Օգյուն Սամասթին բանտից պայմանական վաղաժամկետ ազատ արձակելու որոշումը քաղաքական գործիչների, իրավապաշտպանների և քաղաքացիների քննադատությանն է արժանացել։ Մասնավորապես, հիմնական ընդդիմադիր Ժողովրդահանրապետական ​​կուսակցության նորընտիր (CHP) առաջնորդ Օզգյուր Օզելը հայտարարել է, որ Սամասթն ազատ է արձակվել բանտից, որտեղ «պետք է ցմահ մնար»։

«Մենք խոսքեր չունենք ասելու։ Եթե Օգյուն Սամասթն ազատ է արձակվել լավ պահվածքի համար, ապա յուրաքանչյուր ոք, ով դրանից հետո խոսում է արդարության մասին, իսկապես անբարեխիղճ է»,- ասել է  նա:

Կուսակցության նախկին նախագահ Քեմալ Քըլըչդարօղլուն ևս քննադատել է Սամասթի ազատ արձակումը։

«Նրանք, ովքեր «դատական ​​ճգնաժամ» են ստեղծել՝ ազգի քվեարկությամբ ընտրված պատգամավորին օրենքին հակառակ բանտում պահելու համար, ազատ են արձակում մարդասպաններին։ Մեր եղբայրության վրա փամփուշտ արձակողները, «բարի վարք ունեցողները» դրսում են, իսկ ներսում են լրագրողներ, քաղաքական գործիչները»,- գրել է նա X-ի իր էջում։

Մարդու իրավունքների ասոցիացիայի (İHD) համանախագահ Էրեն Քեսքինն էլ ասել է. «Սա այնքան բռնակալական երկիր է: Գյուլթան Քըշանաքը, Սելահաթթին Դեմիրթաշը, Օսման Քավալան, Ջան Աթալայը բանտում են միայն իրենց մտքերի համար, բայց մարդասպանն ազատության մեջ է»։

Հայտարարություն է տարածել նաև «Հրանտ Դինքի ընկերներ» խումբը։

«Մինչ Հրանտ Դինքի սպանությունը դեռևս բացահայտված չէ և մեղավորները բացահայտված չեն, մինչ մեր ընկերներից շատերը, իրավունքների պաշտպանները, լրագրողները և քաղաքական գործիչներն անարդար և անօրինական կերպով պահվում են բանտերում, Հրանտ Դինքի մարդասպան Օգյուն Սամասթն ազատ արձակվեց։ Մենք դա գիտեինք, բարձրաձայնում էինք, բայց դա հաստատվել է վերջին զարգացմամբ։ Արդարություն չկա, խիղճ չկա։ Նրանք, ովքեր նայում են մեր աչքերի մեջ և ասում՝ «սպանիր», ուժեղացնում են այս խավարը, որը երեխայից մարդասպան է ստեղծում: Մենք չենք հանձնվելու, չենք մոռանալու, շարունակելու ենք ասել՝ մարդասպաններին պաշտպանողները սպանության մեղսակից են։ Այս գործը չի ավարտվի, քանի դեռ չենք ասել, որ վերջացել է»,- ասվում է հայտարարության մեջ։

Էմմա Չոբանյան