Քաղաքականություն
10.11.2023 | 23:00
Գերմանիայի կանցլեր Օլաֆ Շոլցը նոյեմբերի 17-ին Բեռլինում ընդունելու է Թուրքիայի նախագահ Ռեջեփ Թայիփ Էրդողանին։ Կողմերը քննարկելու են իրավիճակը Մերձավոր Արևելքում։ Այս մասին հայտարարել է Գերմանիայի կառավարության խոսնակի պաշտոնակատար Քրիստիանե Հոֆմանը, գրում է DW-ի ռուսական ծառայությունը։
«Հայտնի է, որ Դաշնային կառավարությունն ու Թուրքիայի նախագահը տարբեր վերաբերմունք ունեն ՀԱՄԱՍ-ի հանդեպ, սակայն կարծիքների փոխանակումը շատ կարևոր է»,- նշում է պաշտոնական Բեռլինը։
Էրդողանը հանդիպելու է նաև Գերմանիայի նախագահ Ֆրանկ-Վալտեր Շտայնմայերի հետ։
Գերմանիայի բնակիչների գրեթե կեսը, սակայն, դեմ է Էրդողանի այցին։ Հասարակական կարծիքի ուսումնասիրության YouGov ինստիտուտի կողմից անցկացված հարցման ժամանակ հարցվածների 45 տոկոսը կողմ է արտահայտվել Էրդողանին ուղղված հրավերի չեղարկմանը։ Միևնույն ժամանակ, հարցվածների յուրաքանչյուր երրորդը (32 տոկոսը) կարծում է, որ Գերմանիայի կանցլերը պետք է ընդունի Թուրքիայի առաջնորդին՝ չնայած ՀԱՄԱՍ-ի նկատմամբ Էրդողանի վերաբերմունքին։
Հավելենք, որ Էրդողանի հակաիսրայելական հայտարարությունները դժգոհություն և քննադատական տրամադրություններ են առաջացրել գերմական քաղաքական շրջանակներում։ Factor TV-ն արդեն անդրադարձել է, որ գերմանացի քաղաքական գործիչները վերապահումներ են հայտնել Էրդողանի այցի վերաբերյալ։
Էմմա Չոբանյան
