Եվրահանձնաժողովն իր զեկույցում մտահոգություն է հայտնել ժողովրդավարության և օրենքի գերակայության հարցում Թուրքիայի հետընթացի կապակցությամբ

Թուրքիայի՝ ԵՄ-ին անդամակցության ձգձգված հայտի վերաբերյալ Եվրահանձնաժողովի տարեկան զեկույցում քննադատության է ենթարկվում Անկարայի «լուրջ հետընթացը» ժողովրդավարական չափանիշների, օրենքի գերակայության, մարդու իրավունքների և դատական անկախության վերաբերյալ, գրում է Duvar-ը։

Զեկույցում ասվում է, որ Թուրքիայի դատական համակարգի կառուցվածքային թերությունները չլուծված են մնացել՝ չնայած դատական մի շարք բարեփոխումներին:

«Դատավորների և դատախազների հավաքագրման և առաջխաղացման համար օբյեկտիվ, արժանիքների վրա հիմնված, միատեսակ և նախապես հաստատված չափանիշների բացակայությունը մնում է անհանգստության աղբյուր»,- նշում է Եվրահանձնաժողովը։

Զեկույցը կոչված է թարմացնելու Թուրքիայի առաջընթացի գնահատականը Եվրամիությանն անդամակցելու չափանիշներին համապատասխանելու ուղղությամբ: ԵՄ-ին միանալու Թուրքիայի հայտը սառեցվել է՝ 2005 թվականին անդամակցության բանակցություններ սկսելուց հետո:

Եվրահանձնաժողովը հայտարարել է, որ Թուրքիան ահաբեկչության դեմ պայքարում չի հետևում օրենքի գերակայության, մարդու իրավունքների և հիմնարար ազատությունների սկզբունքներին։ Զեկույցը նաև քննադատում է Թուրքիային Մարդու իրավունքների եվրոպական դատարանի Մեծ պալատի վճիռը չկատարելու համար, որը կոչ էր անում ազատ արձակել բարերար Օսման Քավալային, որը կալանավորվել է 2017 թվականին։

Նշվում է, որ Քավալայի հարցով որոշումը չկատարելը ցույց է տալիս, որ Թուրքիան «հեռանում է մարդու իրավունքների և հիմնարար ազատությունների չափանիշներից, որոնք նա ընդունել է որպես Եվրոպայի խորհրդի անդամ»:

Էմմա Չոբանյան