«Չորրորդն արձակեք ճակատին»․ Կադիրովը հրամայել է կրակել անկարգություններ հրահրողների վրա

Դաղստանում տիրող անկարգությունների ֆոնին Չեչնիայի ղեկավար Ռամզան Կադիրովը կարգադրել է ուժայիններին ծայրահեղ կոշտ միջոցներ ձեռնարկել հնարավոր անկարգությունների դեմ, այդ թվում՝ հրազենի կիրառմամբ, գրում է DW-ի ռուսական ծառայությունը։

«Եթե մենք ունենք թեկուզ մեկ հոգի, որը գնում է չարտոնված անկարգությունների, կալանավորեք և բանտարկեք, կամ երեք նախազգուշական կրակոց արձակեք օդ, իսկ դրանից հետո, եթե օրենքը չի պահպանում, չորրորդն արձակեք ճակատին»,- ասել է նա կառավարության նիստում։

Միևնույն ժամանակ, Կադիրովն ընդգծել է, որ խոսքն «իր հրամանի» մասին է, փոխանցում է «ՌԻԱ Նովոստին»։

Մախաչկալայում հակասեմական անկարգություններից հետո Չեչնիայի Հանրապետության ղեկավարը հայտարարել էր տարածաշրջանում զանգվածային բողոքի ցույցերը կանխելու և «նման սադրանքը» դադարեցնելու անհրաժեշտության մասին։

Դաղստանում հոկտեմբերի 29-ին հակահրեական անկարգություններ են տեղի ունեցել։ Կեսօրից հետո Խասավյուրտ քաղաքում ամբոխ էր հավաքվել «Ֆլամինգո» հյուրանոցի մոտ՝ տեղեկությունների պատճառով, թե հյուրանոցում, իբր, «Իսրայելից փախստականներ» են տեղավորվել։ Հավաքվածները պահանջել են ապացույցներ, որ հյուրանոցում հրեաներ չկան, քարեր են նետել հյուրանոցի ուղղությամբ և բղավել «Ալլահ աքբար»։ Նույն օրը երեկոյան մի քանի հարյուր տեղացիներ ներխուժել են Մախաչկալայի օդանավակայան՝ մինչ Թել Ավիվից Red Wings-ի սովորական չվերթի ժամանումը։ Նրանք ներխուժել են օդանավակայան և հակահրեական կարգախոսներ բղավելով՝ հրեաների փնտրել։ Խռովարարները կոտրել են դռները, փակել մեքենաների ելքը, բռնի կերպով ստուգել այնտեղ գտնվող մարդկանց անձնագրերը, ջարդել ավտոբուսներ և փորձել ներխուժել ինքնաթիռ։