15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Ադրբեջանը մարդասիրական օգնության հերթական խմբաքանակն է ուղարկել Ուկրաինային
Քաղաքականություն
30.10.2023 | 22:55
Ադրբեջանը հումանիտար օգնության հերթական խմբաքանակն է ուղարկել Ուկրաինա։ Այն ներառել է էլեկտրական սարքավորումներ։ Ադրբեջանական լրատվամիջոցների հաղորդմամբ՝ օգնությունն ուղարկվել է Սումգայիթի տեխնոլոգիական պարկի տարածքից։
Նշվում է, որ Ադրբեջանի Էներգետիկայի նախարարության կողմից մատակարարվող մարդասիրական բեռը ներառում է ավելի քան 555 հազար մետր էլեկտրական մալուխներ և լարեր։ Բեռները, որոնք տեղափոխվում են 14 բեռնատարների շարասյունով, ուղարկվում են՝ աջակցելու Ուկրաինայում տիրող իրավիճակի պատճառով տուժած շրջաններում էլեկտրաէներգիայի կայուն մատակարարման վերականգնման համար։ Մարդասիրական օգնությունը հավաքագրվել է Ուկրաինայից ստացված դիմումների հիման վրա՝ ընդհանուր 7,6 մլն դոլարի չափով։ Բեռի հաջորդ մասն ուղարկվելու է մոտ ապագայում։
Ընդհանուր առմամբ, Ադրբեջանի կողմից Ուկրաինային տրամադրվող մարդասիրական օգնության ծավալը գերազանցում է 33 միլիոն դոլարը։
2022-2023 թվականներին Կիևն Ադրբեջանից ստացել է 10 բեռնատար մարդասիրական օգնություն էներգետիկ ոլորտի համար, որոնք ներառել են 50 պահեստային էլեկտրակայան և 45 էլեկտրաէներգետիկ տրանսֆորմատոր։
Հավելենք, որ 2023 թվականի հուլիսին Ադրբեջանի նախագահ Իլհամ Ալիևը հրամանագիր էր ստորագրել երկրի Էներգետիկայի նախարարությանը 7,6 միլիոն դոլար հատկացնելու մասին՝ Ուկրաինային մարդասիրական օգնություն տրամադրելու համար։
Էմմա Չոբանյան
