23.02.2026 | 23:19
Լոնդոնում Էփշտեյնի գործի շրջանակում ձերբակալվել է ԱՄՆ-ում Մեծ Բրիտանիայի նախկին դեսպանը
Վրաստանը թույլ չի տալիս ուկրաինացի նախկին բանտարկյալներին մուտք գործել երկիր
Քաղաքականություն
25.10.2023 | 23:11
Վրաստանի իշխանությունները թույլ չեն տալիս ուկրաինացի նախկին բանտարկյալներին, ովքեր Ռուսաստան էին տարվել 2022 թվականի աշնանը, մուտք գործել երկիր։ Այս մասին գրել է Meduza-ն՝ հղում անելով Վրաստանում ուկրաինացի փախստականներին օգնություն ցուցաբերող «Volunteers Tbilisi» կազմակերպության աշխատակիցներին։
Ըստ կամավորների՝ ուկրաինացի յոթ նախկին բանտարկյալներ ստիպված են եղել 14 օր շարունակ ապրել Վերին Լարսի անցակետի տարածքում։ Նրանք նախ փորձել են հատել Վրաստանի սահմանը հոկտեմբերի 11-ին, սակայն նրանց թույլ չեն տվել երկիր մտնել՝ պատճառաբանելով, որ անհրաժեշտ է նախ պատասխան ստանալ Ուկրաինայի ԱԳՆ-ից։
Հրապարակման մեջ ասվում է, որ բոլոր տղամարդիկ իրենց պատիժը կրել են Խերսոնի գաղութներում և տեղափոխվել Ռուսաստան, երբ 2022 թվականի աշնանը ռուսական զինված ուժերը նահանջել են քաղաքից։ Նախկին բանտարկյալները պատմում են, որ ազատ արձակվելուց հետո իրենց տեղափոխել են Վոլգոգրադի արտաքսման կենտրոն, որտեղ նրանց ութ տարով արգելել են մուտք գործել Ռուսաստանի Դաշնություն։
Meduza-ն հիշեցնում է, որ սա առաջին դեպքը չէ, երբ վրացական իշխանություններն արգելում են ուկրաինացի նախկին բանտարկյալների մուտքը։ 2023 թվականի օգոստոսի վերջին վեց հոգուց բաղկացած ուկրաինացիների խումբը նույն պատճառով տասը օր անցկացրել է Վերին Լարսի անցակետում, ասվում է հրապարակման մեջ։
