07.10.2026 | 16:20
Հայաստանի Կիոկուշին կարատեի ֆեդերացիան կանցկացնի «Սամուրայ» մրցաշարը
ԱՄՆ-ն Իսրայելին խորհուրդ է տալիս հետաձգել Գազա ներխուժումը․ New York Times
Քաղաքականություն
23.10.2023 | 22:38
Բայդենի վարչակազմն Իսրայելին խորհուրդ է տվել հետաձգել ցամաքային ներխուժումը Գազա՝ հուսալով ժամանակ շահել պատանդների ազատ արձակման և պաղեստինցիներին մարդասիրական օգնության մատակարարումն ապահովելու համար։ Այս մասին հայտնում է New York Times-ը՝ վկայակոչելով մի քանի ամերիկացի պաշտոնյաների, փոխանցում է BBC-ի ռուսական ծառայությունը։
Ավելի վաղ էլ Bloomberg-ը գործակալությունը, հղում անելով սեփական աղբյուրներին, հայտնել էր, որ Ջո Բայդենի վարչակազմը, ինչպես նաև որոշ եվրոպական առաջնորդներ ճնշում են գործադրում Իսրայելի վրա՝ ՀԱՄԱՍ-ի դեմ գործողությունը հետաձգելու համար։
Նախօրեին Բայդենի և Իսրայելի վարչապետ Բենիամին Նեթանյահուի միջև տեղի է ունեցել հերթական հեռախոսազրույցը։
Նշվում է, որ ամերիկացիները ցանկանում են նաև իրենց տրամադրության տակ ունենալ ավելի շատ ժամանակ՝ նախապատրաստվելու տարածաշրջանում ԱՄՆ-ի շահերի վրա հարձակումներին Իրանից աջակցվող խմբավորումների կողմից։ Կա լուրջ մտավախություն, որ Գազայում խոշոր ցամաքային գործողության դեպքում այդ հարձակումները կուժեղանան։
Լրատվամիջոցի զրուցակիցները նշել են, որ ամերիկյան վարչակազմն Իսրայելին պահանջներ չի ներկայացնում և նախկինի պես աջակցում է ցամաքային ներխուժմանը, իսկ Իսրայելի նպատակը ՀԱՄԱՍ-ի ոչնչացումն է։
Ցամաքային գործողությունը հետաձգելու խորհուրդը իսրայելցիներին փոխանցել է ԱՄՆ պաշտպանության նախարար Լլոյդ Օսթինը։ Պենտագոնն օգնում է Իսրայելին պլանավորել իր ռազմական գործողությունները, ներառյալ՝ ցամաքային ներխուժումը:
Միաժամանակ, Վաշինգտոնում Իսրայելի դեսպանատան դիվանագետը հերքել է տեղեկությունը, որ ԱՄՆ կառավարությունը հարկադրում է հետաձգել ցամաքային ներխուժումը։
«Մենք սերտ երկխոսություն և խորհրդակցություններ են անցկացնում ամերիկյան վարչակազմի հետ։ ԱՄՆ-ն Իսրայելի վրա ճնշում չի գործադրում ցամաքային գործողության հետ կապված»,- ասել է դիվանագետը։
Էմմա Չոբանյան
