Քաղաքականություն
20.10.2023 | 23:06
Վրաստանի իշխանությունները մանրամասն ծրագիր են մշակել տարածաշրջանում միջուկային պատերազմի դեպքում։ Այս մասին հայտարարել է երկրի Պետական անվտանգության ծառայության ղեկավար Գրիգոլ Լիլուաշվիլին, գրում է The Moscow Times-ը։
«Առկա մարտահրավերները չեն բացառում միջուկային զենքի օգտագործումը։ Ես նկատի չունեմ մեր երկիրը, ես նկատի ունեմ ամբողջ տարածաշրջանը»,- ասել է Լիլուաշվիլին:
Նրա խոսքով՝ մշակված պլանը ներառում է գործողությունների սցենարներ Վրաստանի յուրաքանչյուր գերատեսչության համար։ Մասնավորապես, Առողջապահության նախարարությունն արդեն «կազմել է դեղերի ցանկը», որոնք կբաշխվեն բնակչությանը, ինչպես նաև սահմանել է տուժածների շտապ բուժօգնության ալգորիթմ։
«Բարեբախտաբար, թե ցավոք, մենք նման աշխատանքի մեծ փորձ ձեռք բերեցինք վերջին COVID-19 համաճարակի ժամանակ»,- նշել է Լիլուաշվիլին։
Միաժամանակ, նա խոստովանել է, որ ռմբապաստարաններից մի քանիսը կարող են անօգտագործելի լինել։ Առկա սպառնալիքի հետ կապված Վրաստանը, ըստ Լիլուաշվիլիի, պետք է վարի «չափավոր, պրագմատիկ քաղաքականություն ինչպես երկրի ներսում, այնպես էլ դրսում»։
