Քաղաքականություն
18.10.2023 | 19:44
Վրաստանի նախագահ Սալոմե Զուրաբիշվիլին Եվրամիությանը կոչ է արել Վրաստանին տալ թեկնածուի կարգավիճակ, որպեսզի թույլ չտա Ռուսաստանին մեծացնել իր ազդեցությունը, գրում է Նովոստի-Գրուզիան։
Նա հատուկ հայտարարություն է արել խորհրդարանի ամբիոնից իշխող կուսակցության նախաձեռնությամբ իր իմփիչմենթի քննարկման ժամանակ՝ առանց կառավարության համաձայնության Եվրոպա կատարած ուղևորությունների համար։
«Չնայած այս հակաեվրոպական իմփիչմենթի գործընթացին՝ Վրաստանին չի կարելի լքել, չի կարելի թույլ տալ Ռուսաստանին մեծացնել իր ազդեցությունն այս տարածաշրջանում։ Ես դիմում եմ մեր գործընկերներին՝ որպես այս երկրի նախագահ, ես ներկայացնում եմ ժողովրդին և նրա պատմական ընտրությունը։ Հետևաբար, ես այս երկրի համար թեկնածուի կարգավիճակ խնդրելու լիիրավ լեգիտիմություն և լիազորություն ունեմ: Կարծում եմ, որ որոշում կայացնելիս մեր գործընկերները մի կողմից հաշվի կառնեն վրաց ժողովրդի բազմիցս ապացուցված ձգտումները, մյուս կողմից՝ Վրաստանի և Եվրոպայի ընդհանուր աշխարհաքաղաքական մարտահրավերները»,- ասել է Սալոմե Զուրաբիշվիլին։
Հիշեցնենք՝ Վրաստանի նախագահին իմփիչմենթի ենթարկելու՝ իշխող կուսակցության նախաձեռնությունը տապալվել է։
