07.10.2026 | 17:17
Ռուբիոն հայտարարել է, որ Իրանը «լիովին կորցրել է վերահսկողությունը» Հորմուզի նեղուցի նկատմամբ
Հարավային Կորեան, ԱՄՆ-ը և Ճապոնիան օպերատիվ կապի գիծ են ստեղծել
Քաղաքականություն
17.10.2023 | 23:00
Հարավային Կորեան, Միացյալ Նահանգները և Ճապոնիան ավարտել են եռակողմ օպերատիվ կապի գծի ստեղծման աշխատանքները։ Այս մասին հայտնել է Yonhap գործակալությունը՝ վկայակոչելով հարավկորեացի բարձրաստիճան պաշտոնյային: Սա անվտանգության ոլորտում եռակողմ համագործակցության ամրապնդման հերթական վկայությունն է, գրում է VOA-ն։
Օպերատիվ կապի գիծը գործում է Հյուսիսային Կորեայի հետ ռազմական լարվածության և տարածաշրջանում Չինաստանի ազդեցության աճի ֆոնին: Երեք առաջնորդները պարտավորվել են խորհրդակցել միմյանց հետ ճգնաժամի ժամանակ օգոստոսին կայացած Քեմփ Դեյվիդի գագաթնաժողովում:
Վկայակոչելով անանուն աղբյուրին՝ Yonhap-ը հայտնում է, որ համակարգի տեխնիկական փորձարկումներն ավարտվել են։
«Թեժ գիծը» կօգտագործեն երկրների ղեկավարները կամ նրանց ազգային անվտանգության խորհրդականները ճգնաժամի ժամանակ, ասել է աղբյուրը։ Հարավային Կորեայի ԱԳՆ-ն դեռևս չի հաստատել այս տեղեկությունը։
Միևնույն ժամանակ, երեք երկրների միջուկային հարցերով հատուկ բանագնացները երկուշաբթի Ջակարտայում սկսել են երկօրյա բանակցություններ՝ քննարկելու Հյուսիսային Կորեայի միջուկային ծրագրի հետևանքով առաջացած լարվածության աճը և Փհենյանի ու Մոսկվայի միջև սերտ ռազմական համագործակցությունը:
Հանդիպումը տեղի է ունենում ԱՄՆ-ի նոր մեղադրանքների ֆոնին, որ Հյուսիսային Կորեան վերջերս Ռուսաստանին զենքի մեծ խմբաքանակ է մատակարարել, ինչը, Վաշինգտոնի կարծիքով, երկու երկրների միջև ռազմական հարաբերությունների ընդլայնման նշան է:
Սեպտեմբերին Հյուսիսային Կորեայի առաջնորդ Կիմ Չեն Ընն այցելել է Ռուսաստան, որտեղ հանդիպել է նախագահ Վլադիմիր Պուտինի հետ։ Սա մտավախություն է առաջացրել, որ Փհենյանը կարող է Ռուսաստանին ռազմական աջակցություն ցուցաբերել Ուկրաինայում և ձեռք բերել հրթիռային տեխնոլոգիա, որն արգելված է ՄԱԿ-ի բանաձևերով:
Ռուսաստանի արտաքին գործերի նախարար Սերգեյ Լավրովն այս շաբաթ կայցելի Հյուսիսային Կորեա, հայտնում են ՌԴ ԱԳՆ-ն և Հյուսիսային Կորեայի KCNA լրատվական գործակալությունը։
Երեքշաբթի Հարավային Կորեայի նախագահ Յուն Սեոկ Յոլը, ելույթ ունենալով պաշտպանական ցուցահանդեսի բացման ժամանակ, խոստացել է զարգացնել պաշտպանական արդյունաբերությունը՝ որպես ազգային անվտանգության ռազմավարության առանցքային մաս:
Փհենյանը բազմիցս քննադատել է ԱՄՆ-ի ռազմավարական միջոցների տեղակայումը տարածաշրջանում, այդ թվում՝ վերջերս ամերիկյան ավիակրի ժամանումը՝ դա անվանելով սադրանք:
