Հասարակություն
16.10.2023 | 20:43
Արցախի Անվտանգության խորհրդի նախկին քարտուղար Վիտալի Բալասանյանի նկատմամբ քրեական հետապնդումը դադարեցվել է, գործը՝ կարճվել։ Ինչպես Factor TV-ի հետ զրույցում նշեց նրա պաշտպան Ռաֆայել Մարտիրոսյանը՝ այս մասին իրենք բանավոր են տեղեկացվել։
«Որոշումը մենք չենք ստացել, մեզ բանավոր են տեղեկացրել՝ հաշվի առնելով Արցախում տիրող իրավիճակը, ողբերգական պայթյունի օրերն էր, ամեն ինչ խառնվել էր իրար։ Սակայն համոզված ենք՝ եթե գործի վարույթը շարունակվեր և դատական քննությունն ընթացք ունենար, պարոն Բալասանյանը կարդարացվեր, քանի որ հարուցված քրեական գործը և առաջադրված մեղադրանքը հիմնավոր չեն եղել»,- ասաց Մարտիրոսյանը:
Հիշեցնենք՝ 2023 թվականի հուլիսի 14-ին Արցախի իրավապահ մարմինները ձերբակալել էին Վիտալի Բալասանյանին` Քրեական օրենսգրքի 337-րդ հոդվածի 1-ին մասի հատկանիշներով՝ իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ։ Ձերբակալվել էին նաև Բալասանյանի որդին՝ Արթուր Բալասանյանը, եղբայրը՝ Վաչիկ Բալասանյանը, և քեռորդին՝ Գարիկ Յուզբաշյանը։ Նրանք հարցաքննվել և ավելի ուշ ազատ են արձակվել։
Ըստ քննչական մարմինների՝ քրեական գործը վերաբերում է Բալասանյանի որդու կողմից վարկն իբրև ոչ նպատակային օգտագործելու հետ:
Ռոզա Վարդանյան
