Վրաստանի ՍԴ-ն թույլ է տվել նախագահ Զուրաբիշվիլիի իմփիչմենթի գործընթաց սկսել

Վրաստանի Սահմանադրական դատարանը (ՍԴ) ճանաչել է, որ նախագահ Սալոմե Զուրաբիշվիլին խախտել է օրենքը՝ կառավարության արգելքին հակառակ արտասահման մեկնելով։ Սահմանադրական դատարանի որոշումը թույլ կտա  իմպիչմենտի ընթացակարգ սկսել, ասել է դատարանի նախագահ Մերաբ Թուրավան, գրում է Գրուզիա օնլայնը։

Նշվում է, որ որոշմանը կողմ են քվեարկել ՍԴ ինը անդամներից վեցը։

Սահմանադրական դատարանի որոշումը պետք է հաստատի խորհրդարանը, դրա համար անհրաժեշտ է ստանալ 100 պատգամավորի ձայն։ Խորհրդարանական մեծամասնությունն ունի 84 ձայն՝ 150-ից։ Եթե խորհրդարանը հաստատի որոշումը, նախագահը պաշտոնանկ արված կհամարվի իմփիչմենթի միջոցով։

Հիշեցնենք, որ Զուրաբիշվիլիի հրաժարականը նախաձեռնել է իշխող «Վրացական երազանք» կուսակցությունը։

«Վրաստանի նախագահ Սալոմե Զուրաբիշվիլին 2023 թվականի օգոստոսի 31-ին, սեպտեմբերի 1-ին և 6-ին արտասահմանյան աշխատանքային այցերի ընթացքում առանց կառավարության համաձայնության իրականացրել է ներկայացուցչական լիազորություններ արտաքին քաղաքականության ոլորտում՝ դրանով իսկ խախտելով սահմանադրությունը»,- ասել է Թուրավան։

ՍԴ-ում հարցի քննարկումը սկսվել է հոկտեմբերի 3-ին։ Ինքը՝ Սալոմե Զուրաբիշվիլին, բոյկոտել է ՍԴ նիստը, սակայն ուղարկել է իր փաստաբաններին։

Իշխող կուսակցությունը պնդում է, որ նախագահը խախտել է երկրի հիմնարար օրենքը՝ օգոստոսին և սեպտեմբերին այցելելով մի շարք երկրներ, այդ թվում՝ Գերմանիա և Ֆրանսիա, առանց կառավարության համաձայնության, ինչպես պահանջում է երկրի Սահմանադրության 52-րդ հոդվածը։