Քաղաքականություն
16.10.2023 | 22:56
Ադրբեջանցի պատմաբան, Բաքվի գիտահետազոտական ինստիտուտի տնօրեն Ալթայ Գոյուշովն անդրադարձել է Ադրբեջանի նախագահ Իլհամ Ալիևի՝ նախօրեին հայաթափված Արցախ կատարած այցին, որը նվիրված էր վերջինի իշխանության 20-ամյակին։
«Պատահական չէ, որ Ալիևը դրոշի բարձրացման արարողությունը կազմակերպել է երեկ։ Ուղիղ 20 տարի առաջ այդ օրը նա իշխանության եկավ ծայրահեղ ընտրակեղծիքների միջոցով՝ դաժանորեն ծեծելով այդ կեղծիքին դեմ արտահայտվողներին, սպանելով նրանցից առնվազն մեկին, հազարավորներին բանտարկելով և պետական հեղաշրջման միջոցով։ Սրանով Ադրբեջանը դարձավ դինաստիայի սեփականություն, այսինքն՝ դրվեց բացարձակ ընտանեկան իշխանության հիմքը»,- ասում է Գոյուշովը սոցցանցերում գրառմամբ։
Նա նշում է, որ «այդ օրվանից հազարավոր մարդկանց ունեցվածքն ապամոնտաժվել կամ առգրավվել է, երկրի ունեցվածքը թալանվել ու տարվել է Լոնդոն և օֆշորներ, հազարավոր անմեղ մարդիկ բռնության են ենթարկվել և բանտարկվել, տասնյակ հազարավոր մարդիկ լքել են երկիրը՝ արտերկրում փնտրելով ավելի լավ կյանք, կրթություն, իրենց ընտանիքների և երեխաների համար որակյալ բուժօգնություն և մի քիչ ազատ շնչելու հնարավորություն, իսկ երկրում բոլոր ազատությունները ճնշված և ոչնչացված են»։
Ըստ Գոյուշովի՝ այս ընթացքում «Ալիևների ընտանիքն ամեն ինչ ուներ՝ լոլիկի ու վարունգի վաճառքից մինչև համալսարաններ, արտադրության մենաշնորհ, ներմուծում և արտահանում, բանկեր, շուկաներ, մանրածախ ցանցեր, մեծ հողատարածքներ, մինչդեռ ադրբեջանցիներին վերածել է ստրուկների»։
««Ալիևն ազատագրել է Ղարաբաղը». ավելի զվարճալի արտահայտություն չկա։ Եթե նախկինում երկրի 20 տոկոսը «օկուպացված էր» Հայաստանի կողմից, իսկ 80 տոկոսը՝ Ալիևի կողմից, ապա հիմա ուղիղ 100 տոկոսը գտնվում է Ալիևների դինաստիայի օկուպացիայի տակ։ Բռնապետությունը, բռնակալությունը և ազատությունը միմյանց բացառող հասկացություններ են։ Բռնապետություն, ըստ էության, նշանակում է որոշում պատմության սխալ, մեղավոր, անարդար կողմի, որի վերջը վաղ թե ուշ անխուսափելի է»,- գրել է ադրբեջանցի գործիչը։
Էմմա Չոբանյան
