Սպասելով ԱՄՆ-ի քայլերին՝ Թուրքիան չի շտապում վավերացնել ՆԱՏՕ-ին Շվեդիայի անդամակցության հայտը

Թուրքիան պատրաստ է այս ամիս հետաձգել ՆԱՏՕ-ին միանալու՝ Շվեդիայի հայտի վավերացումը, քանի որ սպասում է ԱՄՆ-ի կողմից F-16 կործանիչների գնմանն աջակցելու նշաններին։ Այս մասին Reuters-ին  ասել են իրավիճակին ծանոթ աղբյուրները։

Հիշեցնենք, որ հուլիսին ՆԱՏՕ-ի գագաթնաժողովին Թուրքիայի նախագահ Ռեջեփ Թայիփ Էրդողանն ասել էր, որ հոկտեմբերին Շվեդիայի անդամակցության հայտի վավերացումը կուղարկվի խորհրդարան։

Այնուամենայնիվ, հոկտեմբերի 1-ին խորհրդարանի աշխատանքի վերսկսումից ի վեր արտաքին հարաբերությունների հանձնաժողովը, որը քննարկելու է հայտը, ստացել է վերանայման շուրջ 60 միջազգային համաձայնագիր՝ բացառությամբ Շվեդիայի հայտի։

Իրավիճակին ծանոթ երկու աղբյուր ասել են, որ Անկարան ցանկանում է շարժվել Վաշինգտոնի հետ համատեղ։ Սպասվում է, որ Պետքարտուղարությունն ինչ-որ պահի կպահանջի Կոնգրեսի հավանությունը Թուրքիային 20 միլիարդ դոլար արժողությամբ F-16 կործանիչներ և տասնյակ արդիական սարքավորումներ վաճառելու համար:

«Հաշվի առնելով F-16-ների հարցում անվստահությունը՝ Թուրքիան չի շտապում վավերացնել Շվեդիայի հայտը և նշան է փնտրում, որ Միացյալ Նահանգները միաժամանակ քայլեր է ձեռնարկում»,- ասել է Էրդողանի գլխավորած իշխող ԱԶԿ-ի ներկայացուցիչը։

Բանակցություններին ծանոթ երկրորդ աղբյուրն էլ ասել է, որ առաջարկը, որում կողմերից յուրաքանչյուրը մի կողմից քայլեր կձեռնարկի ՆԱՏՕ-ի հայտը վավերացնելու, իսկ մյուս կողմից՝ F-16-ների գնման ուղղությամբ, հետաձգվել է:

Էրդողանի գրասենյակից լրատվամիջոցին չեն պատասխանել, իսկ ԱՄՆ Պետքարտուղարությունից ասել են՝ անհամբեր սպասում են, որ Շվեդիան միանա ՆԱՏՕ-ին «մոտ ապագայում», և որ նախագահ Ջո Բայդենն աջակցում է F-16-ների վաճառքին՝ ի շահ դաշինքի, Միացյալ Նահանգների և Թուրքիայի հետ նրա հարաբերությունների։

Էմմա Չոբանյան