Քաղաքականություն
13.10.2023 | 19:54
ՀՀ ԱԺ եվրոպական ինտեգրման հարցերի մշտական հանձնաժողովի անդամները հոկտեմբերի 13-ին հանդիպել են Եվրոպական խորհրդարանի պատգամավոր, արտաքին հարցերով կոմիտեի անդամ Վիոլա ֆոն Կրամոն-Թաուբադելի հետ: ԱԺ մամուլի ծառայության փոխանցմամբ՝ հանդիպմանը ներկա է եղել նաև Հայաստանում Եվրոպական միության պատվիրակության ղեկավար, դեսպան Վասիլիս Մարագոսը:
«Հանձնաժողովի նախագահ Արման Եղոյանը շնորհակալություն է հայտնել Եվրոպական խորհրդարանին` հոկտեմբերի 5-ին ընդունած` «Ադրբեջանի հարձակումից հետո Լեռնային Ղարաբաղում ստեղծված իրավիճակի մասին» բանաձևի համար, որում խստագույնս դատապարտվել է Ադրբեջանի կողմից Լեռնային Ղարաբաղի հայերի դեմ նախապես ծրագրված և չարդարացված ռազմական հարձակումը:
Պատգամավորների ուշադրության կենտրոնում են եղել Լեռնային Ղարաբաղից բռնի տեղահանված բնակիչների կարիքների բավարարմանն ուղղված կարճաժամկետ և երկարաժամկետ ծրագրերը: Անդրադարձ է եղել Հայաստանի ինքնիշխանության և տարածքային ամբողջականության դեմ ուղղված կոչերին և դրանց հակադարձելու մեխանիզմներին:
Վիոլա ֆոն Կրամոն-Թաուբադելը, շնորհակալություն հայտնելով ընդունելության համար, նշել է, որ այստեղ` Հայաստանում տիրող իրավիճակին ծանոթանալու համար նման այցերը մեծ նշանակություն ունեն: Նրա խոսքով՝ բանաձևերն ու կոշտ հայտարարությունները շատ կարևոր են, սակայն ժամանակն է, որ Եվրոպական միությունը հստակ քայլեր ձեռնարկի:
Կարևորվել է ԵՄ և անդամ պետությունների ներգրավվածությունը խաղաղության պայմանագրի կնքման գործընթացին:
Քննարկվել են նաև տնտեսական, ժողովրդավարական բարեփոխումներին և այլ ոլորտներին առնչվող հարցեր»,- ասված է հաղորդագրության մեջ:
