07.10.2026 | 23:00
Երթևեկության կազմակերպման փոփոխություն՝ Հակոբ Պարոնյան փողոցում
Շինծու դատավարություն՝ նորմերի անտեսմամբ․ ՀՀ ԱԳՆ-ն՝ Ադրբեջանում Վագիֆ Խաչատրյանի ապօրինի դատավարության մասին
Քաղաքականություն
13.10.2023 | 16:39
ՀՀ ԱԳՆ խոսնակ Անի Բադալյանն անդրադարձել է այսօր Ադրբեջանում մեկնարկած Վագիֆ Խաչատրյանի ապօրինի դատավարության գործընթացին։
«Շինծու դատավարություն, Բաքվում ցանկացած նորմերի լիակատար անտեսման ցուցադրություն Հայաստանի քաղաքացի Լեռնային Ղարաբաղի բնակիչ 68-ամյա Վագիֆ Խաչատրյանի նկատմամբ, որը ԿԽՄԿ պաշտպանության ներքո տեղափոխվում էր Հայաստան՝ սրտի վիրահատության համար և առևանգվել է ապօրինի անցակետում ԼՂ-ում էթնիկ զտումներից շաբաթներ առաջ»,- գրել է ԱԳՆ խոսնակը X-ի իր էջում։
Անի Բադալյանը նշել է, որ խախտվել են Վագիֆ Խաչատրյանի իրավունքները։
«Ապօրինի առևանգմանը, որը միջազգային հումանիտար իրավունքի կոպտագույն խախտում է, այժմ հաջորդում է 68-ամյա քաղաքացիական անձի տառապանքը ցուցադրող տեսանյութերի և լուսանկարների հրապարակումը։ Ինչպես պահանջել են բազմաթիվ միջազգային իրավապաշտպան կազմակերպություններ և հաստատություններ՝ Բաքվում դեռևս պատանդ պահվող հայ ռազմագերիներն ու քաղաքացիական անձինք պետք է ազատ արձակվեն»,- ասվում է հայտարարության մեջ։
Հիշեցնենք, որ Կարմիր Խաչի միջազգային կոմիտեի ուղեկցությամբ հուլիսի 29-ին բուժման նպատակով Արցախից Հայաստան տեղափոխվող Վագիֆ Խաչատրյանն առևանգվել է Ադրբեջանի կողմից Լաչինի միջանցքի ապօրինի անցակետում։ Այնուհետև Բաքուն շինծու մեղադրանքներ է առաջադրել՝ Խաչատրյանին անհիմն մեղադրելով «զանգվածային սպանությունների մեջ»։
Էմմա Չոբանյան
