Քաղաքականություն
12.10.2023 | 11:47
Բիշքեկում ԱՊՀ ԱԳ նախարարների խորհրդի նիստից հետո ՌԴ ԱԳ նախարար Սերգեյ Լավրովը լրագրողների հետ զրույցում հայտարարել է, թե «Ռուսաստանը Հարավային Կովկասում տեսնում է ՆԱՏՕ-ի երկրների շահերը Հայաստանի միջոցով առաջ տանելու փորձեր»։
«Ինչ վերաբերում է հակառուսական տրամադրությունների սրմանը, ապա դա արվում է արհեստականորեն։ Մենք գիտենք հասարակական կազմակերպությունների թվի մասին, որոնք Հայաստանում ստեղծվել են վերջին տարիներին, նախկինում ևս քիչ չեն եղել։ Այդ կազմակերպությունները չեն ստեղծվում Հայաստանի ու ՌԴ-ի միջև բարեկամական հարաբերությունները խթանելու նպատակով։ Ճիշտ հակառակը։ Դրանք միտված են հող ստեղծելու հակառուսական տրամադրությունների համար և նախապատրաստման այդ տարածաշրջանում Հայաստանով առաջին հերթին ԱՄՆ-ի, ԵՄ-ի ու ՆԱՏՕ-ի անդամ երկրների առաջմղման համար։ Մենք տեսնում ենք, որ այդ փորձերը հասնում են ինչ-որ արդյունքների»,-ասել է Լավրովը՝ նշելով, թե Ռուսաստանում «կա խորը համոզմունք, որ հայ ժողովրդի ճնշող մեծամասնությունը շահագրգռված է Ռուսաստանի Դաշնության հետ ավանդական, պատմականորեն եղբայրական կապերի զարգացմամբ»։
«Ուզում եմ ձեր ուշադրությունը հրավիրել այն փաստի վրա, որ մի քանի օր առաջ վարչապետ Փաշինյանը հարցազրույց է տվել, և դրանում հստակ ասել, որ Հայաստանը չի փոխում իր վեկտորը։ Հուսանք, որ այս դիրքորոշումը գերակայելու է՝ չնայած նրան այլ ուղղությամբ տանելու փորձերին», հայտարարել է ՌԴ ԱԳ նախարարը։
