26.06.2026 | 16:54
Մահացել է ՌԴ պաշտպանության նախկին նախարար Սերգեյ Իվանովը
Արմեն Աշոտյանը կշարունակի մնալ կալանքի տակ. դատարանը ևս 3 ամսով երկարացրեց ընտրված խափանման միջոցը
Հասարակություն
11.10.2023 | 22:03
ՀՀԿ փոխնախագահ Արմեն Աշոտյանը կշարունակի մնալ կալանքի տակ։ Հակակոռուպցիոն դատարանը՝ դատավոր Վահե Դոլմազյանի նախագահությամբ, քիչ առաջ հրապարակեց Աշոտյանի նկատմամբ ընտրված խափանման միջոց կալանավորման ժամկետը ևս երեք ամսով երկարացնելու որոշումը։
Ավելի վաղ պաշտպանական կողմը միջնորդել էր վերացնել Աշոտյանի նկատմամբ որպես խափանման միջոց կիրառված կալանքը և այն փոխարինել անազատության հետ չկապված խափանման միջոցով։
Մասնավորապես, որպես այլընտրանքային խափանման միջոց՝ առաջարկվել էր 40 միլիոն դրամի չափով գրավը, տնային կալանքը և անձնական երաշխավորությունը։ Մեղադրող դատախազներն առարկել էին միջնորդության դեմ՝ հայտարարելով, թե գործով դեռևս պետք է հարցաքննվեն վկաները, իսկ ազատ արձակման դեպքում Աշոտյանը կարող է խոչընդոտել գործի քննությանը՝ ազդելով վկաների վրա։
Ի վերջո, կողմերին լսելուց հետո դատավոր Դոլմազյանը որոշում կայացրեց մերժել պաշտպանության կողմի միջնորդությունը։
Հիշեցնենք՝ ըստ Քննչական կոմիտեի՝ ՀՀԿ փոխնախագահ Արմեն Աշոտյանը խախտել է խափանման միջոցի պայմանները:
Աշոտյանը «Երևանի Մխիթար Հերացու անվան պետական բժշկական համալսարան» հիմնադրամում կատարված առերևույթ չարաշահումների գործով մեղադրվում է պաշտոնեական դիրքի չարաշահման և փողերի լվացման հոդվածներով, որն առաջացրել է ծանր հետևանքներ։
