Պուտինը վաղը Բիշքեկում կհանդիպի Ալիևին

Հոկտեմբերի 12-ին նախատեսված է ՌԴ նախագահ Վլադիմիր Պուտինի հանդիպումը Ադրբեջանի ղեկավար Իլհամ Ալիևի հետ, որի ընթացքում կողմերը քննարկելու են Լեռնային Ղարաբաղի և ռուս խաղաղապահների շուրջ ստեղծված իրավիճակը։ Այս մասին գրում է Ռիա Նովոստին՝ հղում անելով ՌԴ նախագահի օգնական Յուրի Ուշակովին։ Ըստ նրա՝ անդրադարձ է լինելու խաղաղապահների հետագա գործունեությանը՝ Ղարաբաղի հայերի հնարավոր վերադարձի ապահովման համատեքստում։

Երկու երկրների ղեկավարների հանդիպումը նախորդելու է հոկտեմբերի 13-ին կայանալիք ԱՊՀ պետությունների ղեկավարների խորհրդի նիստին։

«Ճաշից հետո նախատեսվում է զրույց Ադրբեջանի նախագահ Ալիևի հետ․ կարող եմ ասել, որ մենք շատ ենք կարևորում այս շփումը, ռուս-ադրբեջանական հարաբերությունները գտնվում են բարձր մակարդակի վրա և դինամիկ զարգանում են։ Նախագահները մտքեր կփոխանակեն հետագա զարգացման հեռանկարների շուրջ ինչպես տնտեսական դաշտում, այնպես էլ տրանսպորտի, լոգիստիկայի, էներգետիկայի և արդյունաբերության ոլորտներում համատեղ նախաձեռնությունների իրականացման համատեքստում»,-ասել է Ուշակովը՝ նշելով, որ Արցախի շուրջ իրավիճակը ևս քննարկվելու է։

«Իհարկե, քննարկելու են Ղարաբաղի շուրջ իրավիճակը։ Օրակարգում Ղարաբաղի հայերի խաղաղ ինտեգրումն է Ադրբեջանի իրավական դաշտին՝ հարգելով միջազգայնորեն ճանաչված իրավունքներն ու ազատությունները, և ռուսական խաղաղապահ զորախումբը պատրաստ է դրան նպաստել։ Հենց ռուս խաղաղապահների շուրջ ստեղծված իրավիճակն է, որը մենք հուսով ենք, որ մեր նախագահը կքննարկի նախագահ Ալիևի հետ միասին»,- հավելել է Ուշակովը։

Ուշագրավ է, որ ռուս պաշտոնյան արցախահայերի ինտեգրման և խաղաղապահների գործունեության մասին խոսում է Արցախի ամբողջական հայաթափման պայմաններում։

Ուշակովը նշել է, թե ռուսական խաղաղապահ զորախմբի մանդատը լրանում է 2025 թվականի դեկտեմբերին։

«Այնտեղ դիտարկվելու են  մեր զորախմբի հնարավոր հետագա օգտագործման տարբեր տարբերակները, այդ թվում՝ Ղարաբաղի հայերի բնակության վայրեր հնարավոր վերադարձի ապահովման համատեքստում, որտեղից նրանք հեռացել են սեպտեմբերին հայտնի իրադարձություններից հետո»,-ասել է ՌԴ նախագահի օգնականը։