ՌԴ-ն ձգտում է նվազեցնել Ուկրաինայի հանդեպ ուշադրությունը․ Զելենսկի

ՌԴ-ն շահագրգռված է, որպեսզի նվազեցնի Ուկրաինային օգնությունը, և դրա համար անգամ դիմում է ողբերգական բաների։ Այս մասին Բրյուսելում ասել է Ուկրաինայի նախագահ Վլադիմիր Զելենսկին, գրում է Korrespondent-ը։

Նա ասել է, որ Իսրայելի պատերազմի և մի շարք եվրոպական երկրներում ղեկավարության փոփոխությունների ֆոնին Ուկրաինային աջակցության մակարդակի անկման որոշակի ռիսկեր է տեսնում։

«Որովհետև եթե չօգնենք Ուկրաինային, պատերազմը չի ավարտվի, մենք չենք ունենա իշխանություն, Ռուսաստանը կվերադառնա՝ ոչնչացնելու ամբողջ Ուկրաինան և առաջ կգնա։ Իսկ հետո արդեն կլինեն Եվրամիության և ՆԱՏՕ-ի երկրները»,- ասել է Զելենսկին։

Նա կարծում է, որ այն, ինչ հիմա կատարվում է աշխարհում, պատահական չէ. «Այսօր նրանք շահագրգռված են տեսնել, որ Ուկրաինային օգնությունը նվազում է, և նրանք անում են տարբեր բաներ, նույնիսկ ողբերգական բաներ, նույնիսկ այլ մայրցամաքներում, աշխարհի այլ մասերում: Ուկրաինայի նկատմամբ ուշադրությունը նվազեցնելու, Ուկրաինային օգնությունը կրճատելու համար»։

Զելենսկիի խոսքով՝ «աշխարհը գտնվում է մի իրավիճակում, երբ համաշխարհային պատերազմ կարող է սկսվել ցանկացած մայրցամաքում, հետևաբար, առաջնորդները ոչ թե զենքի, այլ քաղաքականության շնորհիվ կարող են կասեցնել հնարավոր գլոբալ պատերազմը»։

«Բոլորի համար ամենաէժան տարբերակը Ռուսաստանին այստեղ կանգնեցնելն է, պատերազմն այստեղ վերջացնելը, նրանց մեր տարածքից դուրս հանելն է։ Այդ ժամանակ, վստահ եմ, մեծ պատերազմ չի լինի և՛ Եվրոպայում, և՛ ամբողջ աշխարհում»,- ասել է Ուկրաինայի նախագահը։