06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Գազայի հատվածի գրեթե 264 հազար բնակիչ լքել է տները մարտերի պատճառով․ ՄԱԿ
Քաղաքականություն
11.10.2023 | 22:20
Իսրայելի և ՀԱՄԱՍ-ի միջև հակամարտության սկզբից ի վեր Գազայի հատվածում բնակվող գրեթե 264 հազար պաղեստինցիներ ստիպված են եղել լքել իրենց տները։ Այս մասին են վկայում ՄԱԿ-ի հումանիտար հարցերի համակարգման գրասենյակի տվյալները։
Իրենց տները լքած 264 հազարից ավելի քան 175 հազար 486 մարդ ապաստան է փնտրում ՄԱԿ-ի Մերձավոր Արևելքի գործակալության հատուկ հաստատություններում։
Վերջին անգամ ՄԱԿ-ը Գազայի հատվածում իրենց տները լքածների մասին տվյալներ է տրամադրել նախօրեին՝ հոկտեմբերի 10-ին։ Այն ժամանակ նշվում էր 187 հազար մարդու մասին։
ՀԱՄԱՍ-ի հարձակումներն Իսրայելի տարածքի վրա սկսվել են հոկտեմբերի 7-ին։ Ի պատասխան՝ իսրայելական բանակը ռազմական գործողություն է սկսել Գազայի հատվածում։ Ավելի ուշ Իսրայելը հայտարարել է, որ պատերազմական իրավիճակում է: Իսրայելական «Կան» ռադիոկայանը հայտնել է, որ վերջին տվյալներով՝ ՀԱՄԱՍ-ի հարձակումների հետևանքով զոհերի թիվը հասել է 1200-ի, ավելի քան 3000-ը վիրավորվել է։
Պաղեստինյան կողմը հաղորդում է 830 զոհի և 4250 վիրավորի մասին։ Ըստ ՄԱԿ-ի՝ 50-ից 100 մարդ, այդ թվում՝ քաղաքացիներ և զինվորականներ, բռնի ուժով Իսրայելից տեղափոխվել է Գազայի հատված։
