02.11.2024 | 16:34
Երևանի 2 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Զելենսկին հայտարարել է, որ պատրաստ է կրկին առաջադրվել Ուկրաինայի նախագահի պաշտոնի համար
Քաղաքականություն
11.10.2023 | 20:24
Ուկրաինայի նախագահ Վլադիմիր Զելենսկին հայտարարել է, որ պատրաստ է երկրորդ անգամ առաջադրվել Ուկրաինայի նախագահի պաշտոնում, եթե Ռուսաստանի հետ պատերազմը չավարտվի մինչև ընտրությունները, փոխանցում է BBC-ի ռուսական ծառայությունը։
Հաջորդ նախագահական ընտրություններն Ուկրաինայում պետք է տեղի ունենան 2024 թվականին, սակայն, ըստ ուկրաինական օրենքների, քվեարկություն չի կարող անցկացվել ռազմական դրության ժամանակ։
«Եթե պատերազմը շարունակվի՝ այո, եթե պատերազմն ավարտվի՝ ոչ։ Ես չեմ կարող փախչել պատերազմի ժամանակ»,- ասել է Զելենսկին ռումինական Digi24.ro-ին տված հարցազրույցում։
Պատասխանելով հարցին, թե իր կանխատեսմամբ՝ ե՞րբ կավարտվի պատերազմը, նա ասել է․ «Ես չեմ կարող ձեզ ճշգրիտ ամսաթիվ ասել, կարծում եմ՝ ոչ ոք չի կարող: Ես գիտեմ, որ մենք գնում ենք հակահարձակման, որ Ռուսաստանը կլքի մեր տարածքները։ Կարծում եմ՝ գիտեմ, թե երբ, բայց նաև չեմ կարող ձեզ ասել»:
Զելենսկին նշել է, որ պատերազմի ավարտին են մոտենում։
«Սա պատերազմի վերջին փուլն է։ Սա դրա կեսը չէ: Առաջին փուլն օկուպացիան էր, որին հաջորդեց հարձակման դադարեցումը և նախաձեռնությունը սեփական ձեռքը վերցնելը: Կարծում եմ, որ մենք վերջին մասում ենք: Շատ մտավախություններ ունենք՝ փող, զենք։ Բայց մենք վերջին մասում ենք՝ ամենադժվարին»,- ասել է նա։
2019-ի նախագահական ընտրություններից առաջ Զելենսկին իր նախընտրական ծրագրում խոստացել էր, որ իշխանության կմնա միայն մեկ ժամկետով՝ «փոխելու համակարգը հանուն ապագայի», այնուհետև պաշտոնը կհանձնի «քաղաքական գործիչների նոր սերնդին»։
Էմմա Չոբանյան
