Քաղաքականություն
10.10.2023 | 18:14
Ռուս խաղաղապահների գործունեությունը Լեռնային Ղարաբաղում կհարմարեցվի նոր պայմաններին։ Այս մասին իր ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Վերջին մեկ տարվա ընթացքում իրավիճակը Ղարաբաղում կտրուկ փոխվել է. 2022 թվականի հոկտեմբերին Պրահայում Եվրամիության հովանու ներքո կայացած գագաթնաժողովում Հայաստանի վարչապետը ճանաչեց Ղարաբաղը որպես ադրբեջանական տարածք և վերահաստատեց իր դիրքորոշումը այս տարվա մայիսին և հուլիսին Բրյուսելում կայացած գագաթնաժողովներում։ Այսպիսով, պայմանները, որոնցով ռուս խաղաղապահ զորակազմը տեղակայվել է 2020 թ-ին՝ լրջորեն փոփոխվել են, իսկ այս տարվա սեպտեմբերի 19-20-ի բախումներից հետո բնակչության զանգվածային գաղթի ֆոնին մեր խաղաղապահների գործունեությունը կհարմարեցվի։ ՌԴ խաղաղապահ զորախումբի մի շարք մշտական և ժամանակավոր հենակետեր արդեն փակվել են։ Բաքվի հետ քննարկվում են մեր խաղաղապահներին վերաբերող հիմնարար հարցեր»,-հայտարարել է Զախարովան։
