Քաղաքականություն
09.10.2023 | 17:10
Թուրքիայի պաշտպանության նախարար Յաշար Գյուլերը երկրի Ազգային պաշտպանության համալսարանի 2023-2024 ուսումնական տարվա բացման արարողության ժամանակ ունեցած ելույթում հայտարարել է, թե աջակցում են «եղբայրական, բարեկամ և դաշնակից երկրներին Կոսովոյում, Բոսնիա և Հերցեգովինայում ու շատ այլ տեղերում՝ նպաստելով միջազգային խաղաղությանն ու կայունությանը»:
Նա նշել է, որ «կանգնած են իրենց թանկագին ադրբեջանցի եղբայրների կողքին, որոնց հետ միավորված են վշտի և ուրախության մեջ՝ «երկու պետություն, մեկ ազգ» կարգախոսով իրենց արդար գործի համար»։
«Մենք աջակցում ենք ադրբեջանական բանակի կողմից իր տարածքային ամբողջականությունը պաշտպանելու օրինական քայլերին։ Այս համատեքստում մենք սրտանց շնորհավորում ենք մեր սիրելի եղբայրներին վերջին հաղթանակի կապակցությամբ։ Այժմ Ադրբեջանի և Հայաստանի միջև մշտական խաղաղության հաստատման նոր հնարավորություն է բացվել։ Մենք ակնկալում ենք, որ Հայաստանը կգործի այս գիտակցությամբ»,- ասել է Գյուլերը։
Նա նշել է, թե «հուսով են, որ համապարփակ կարգավորումը հնարավորինս շուտ կլինի՝ հանուն տարածաշրջանի կայունության և բարգավաճման»։
Էմմա Չոբանյան
