15.09.2026 | 18:03
«Քրոջս հաշվին եք ուզում «հողեր հետ բերել», որը զոհվել է 2022-ին՝ ծառայության ընթացքում»․ Ալխաս Ղազարյան․ ՏԵՍԱՆՅՈՒԹ
Իսրայելի բանակը վերականգնել է վերահսկողությունը երկրի ամբողջ տարածքի նկատմամբ
Քաղաքականություն
09.10.2023 | 14:56
Իսրայելում արդեն երրորդ օրն է՝ շարունակվում են մարտերը պաղեստինյան ՀԱՄԱՍ արմատական շարժման հարձակման պատճառով։ Իսրայելական բանակը հայտարարել է այն բնակավայրերում վերահսկողությունը լիովին վերականգնելու մասին, որոնք նախկինում հարձակման էին ենթարկվել ՀԱՄԱՍ շարժման զինյալների կողմից, գրում է DW-ի ռուսական ծառայությունը։
«Մենք ամբողջովին վերահսկում ենք այդ բնակավայրերը»,- հայտարարել է Իսրայելի բանակի ներկայացուցիչ Դանիել Հագարին՝ մեկնաբանելով Գազայի հատվածի հետ սահմանին տիրող իրավիճակը։
Նա, միաժամանակ, հայտնել է, որ «ահաբեկիչները դեռ կարող են լինել տեղերում»։
Ընդհանուր առմամբ, ըստ իսրայելական բանակի գնահատականների՝ ռազմական գործողությունների մեկնարկից ի վեր արդեն հարյուրավոր զինյալներ են սպանվել, այդ թվում՝ մոտ 500-ը՝ Գազայի հատվածում։
Գիշերն ու առավոտյան Իսրայելը շարունակել է հարվածներ հասցնել Գազային ՀԱՄԱՍ-ի և «Իսլամական ջիհադի» ավելի քան 500 օբյեկտների, այդ թվում՝ ութ հրամանատարական կենտրոնների: ՀԱՄԱՍ-ն իր հերթին հայտնել է Աշքելոնի վրա զանգվածային հրթիռային հարձակման մասին՝ շուրջ 100 հրթիռ է արձակվել քաղաքի վրա։ Ավելի վաղ էլ զինյալները հրթիռներ էին արձակել Թել Ավիվի Բեն Գուրիոն օդանավակայանի ուղղությամբ։
Իսրայելի բանակը հայտարարել է նաև հարյուր հազարավոր պահեստազորի հավաքագրման մասին: Ենթադրվում է, որ առաջիկա երկու օրերին Իսրայելը ցամաքային գործողություն է սկսելու Գազայի հատվածում։
Էմմա Չոբանյան
