Քաղաքականություն
09.10.2023 | 13:14
Իսրայելական բանակը դեռևս կռվում է ՀԱՄԱՍ-ի զինյալների դեմ Իսրայելի հարավում՝ Գազայի հատվածի մոտակայքում գտնվող յոթից ութ տարածքներում։ Այս մասին այսօր առավոտյան ճեպազրույցի ժամանակ հայտնել են Իսրայելի պաշտպանության բանակը, գրում է BBC-ի ռուսական ծառայությունը:
Դրանց թվում են Կիբուց Բեերիին, ուր ՀԱՄԱՍ-ի զինյալները ներթափանցել են շաբաթ առավոտյան: Նրանցից շատերը սպանվել են, բայց մյուսները դեռ թաքնված են Կիբուցի տներում, հայտնել են Իսրայելի պաշտպանության բանակից:
«Այս գործողության մասշտաբները բոլորովին տարբեր են [նախորդներից]։ Իսրայելում իրավիճակը պաշտպանության և անվտանգության վիճակին վերադարձնելու համար ավելի երկար ժամանակ է պահանջում, քան մենք ակնկալում էինք»,- ասել է Իսրայելի պաշտպանության բանակի խոսնակ Ռիչարդ Հեխտը:
Փոխգնդապետը չի բացառել, որ զինյալները դեռ կարող են ներթափանցել Իսրայելի տարածք. «Չեմ կարող ասել, որ նրանք այլևս չեն գալիս»։
Մինչ այդ, Իսրայելի պաշտպանության բանակը հայտնել է, որ օդային և հրետանային հարվածներ է հասցրել Գազայի հատվածում ՀԱՄԱՍ-ին և «Իսլամական ջիհադ»-ին պատկանող ավելի քան 500 թիրախների:
Հայտարարության համաձայն՝ կործանիչները, ուղղաթիռները և հրետանին հարվածներ են հասցրել «ահաբեկիչների ավելի քան 500 թիրախների», ինչպես նաև «հարձակման են ենթարկվել ՀԱՄԱՍ-ի յոթ հրամանատարական կենտրոններ և «Իսլամական ջիհադի» հրամանատարական կենտրոնը։
Իսրայելի զինվորականները նաև հարվածներ են հասցրել «մի շարք բազմահարկ շենքերի», որոնցից մեկում, ըստ նրանց, գտնվում էր «Համասի ահաբեկիչների հրամանատարական կենտրոնը», որտեղից իրականացվել է իսրայել ներթափանցած զինյալների ղեկավարումը:
ՀԱՄԱՍ-ի զինյալները շաբաթ օրը հարձակվել են իսրայելական քաղաքների վրա՝ սպանելով առնվազն 700 մարդու։ Կիրակի Իսրայելն օդային հարվածներ է հասցրել Գազայի հատվածին, ինչի հետևանքով զոհվել է մոտ 370 պաղեստինցի։ Մտավախություններ կան, որ բռնության աճը կարող է սպառնալ Մերձավոր Արևելքում նոր լայնածավալ պատերազմի մեկնարկով։
