07.10.2026 | 16:00
2-րդ դասարանի աշակերտուհուն ծեծելու դեպքով ուսուցչուհուն ձերբակալելու որոշում է կայացվել
Ֆինանսների նախարարն ընդունել է ԶՖԳ տարածաշրջանային գրասենյակի ղեկավարին եւ Ֆրանսիայի դեսպանին
Քաղաքականություն
06.10.2023 | 17:53
ՀՀ ֆինանսների նախարար Վահե Հովհաննիսյանը հյուրընկալել է Հարավային Կովկասում Զարգացման ֆրանսիական գործակալության (ԶՖԳ) տարածաշրջանային գրասենյակի նորանշանակ ղեկավար Ֆաննի Դելպեյին: Հանդիպմանը ներկա է եղել նաեւ Հայաստանում Ֆրանսիայի արտակարգ եւ լիազոր դեսպան Օլիվիե Դըկոտինին․ տեղեկացնում են գերատեսչությունից։
Շնորհավորելով Ֆաննի Դելպեյին նոր պաշտոնը ստանձնելու կապակցությամբ՝ նախարարը հույս է հայտնել, որ վերջինիս ղեկավարությամբ Զարգացման ֆրանսիական գործակալության հետ առկա արդյունավետ համագործակցությունն առավել կընդլայնվի՝ համատեղ սահմանված թիրախներին հասնելու նպատակադրմամբ, նաեւ նկատի ունենալով, որ ներկայումս հայ-ֆրանսիական հարաբերությունները զարգացման որակական նոր փուլ են թեւակոխել:
Ֆաննի Դելպեյը շնորհակալություն է հայտնել ընդունելության համար եւ վերահաստատել Հայաստանին աջակցելու պատրաստակամությունը: Կարեւորվել է էներգետիկայի, ոռոգման եւ ջրային ենթակառուցվածքների, ճանապարհաշինության ոլորտներում ծրագրերի ֆինանսավորման ուղղություններով համագործակցությունը: Որպես համագործակցության առանցքային ուղղություն՝ շեշտադրվել է նաեւ բյուջետային աջակցությունը: Կարեւորելով ընթացիկ ծրագրերի արդյունավետ ու անխոչընդոտ իրականացումը՝ կողմերն անդրադարձել են նաեւ համագործակցության հնարավոր նոր ուղղություններին: Անդրադառնալով Լեռնային Ղարաբաղում վերջին զարգացումների արդյունքում ստեղծված հումանիտար իրավիճակին՝ ֆրանսիական կողմը պատրաստակամություն է հայտնել տարբեր աջակցության գործիքների միջոցով օժանդակել Լեռնային Ղարաբաղից Հայաստան բռնի տեղահանված անձանց սոցիալական խնդիրների լուծմանը:
Նախարար Հովհաննիսյանն իր երախտագիտությունն է հայտնել ֆրանսիական կողմին շարունակական աջակցության, մասնավորապես՝ ներկայումս ստեղծված անվտանգային եւ հումանիտար իրավիճակին պատշաճ արձագանքելու եւ այդ ուղղությամբ գործադրված բոլոր ջանքերի համար:
