15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Վճռական բողոք ենք հայտնում․ Բաքվի Մեջլիսի արձագանքը` Արցախում Ադրբեջանի էթնիկ զտումը դատապարտող ԵԽ բանաձևին
Քաղաքականություն
06.10.2023 | 14:22
Ադրբեջանի Միլլի Մեջլիսի այսօրվա նիստում քննարկման է ներկայացվել Եվրախորհրդարանի կողմից Արցախում Բաքվի իրականացրած էթնիկ զտումները դատապարտող բանաձևի վերաբերյալ հայտարարություն։ Բուռն քննարկումից հետո հայտարարությունը դրվել է քվեարկության և ընդունվել, գրում են ադրբեջանական քարոզչական լրատվամիջոցները։
Դրանում ասվում է, որ Միլլի Մեջլիսը վճռական բողոք է հայտնում «2023 թվականի հոկտեմբերի 5-ին Եվրախորհրդարանի կողմից ընդունված կողմնակալ և ոչ օբյեկտիվ բանաձևի դեմ ու խստորեն դատապարտում է Ադրբեջանի դեմ ուղղված այդ գործողությունը»։
«Հիշեցնում ենք, որ Ադրբեջանը պարտավորություններ չունի Եվրախորհրդարանի նկատմամբ։ Ավելի լավ կլիներ, եթե Եվրախորհրդարանը զբաղվեր իսլամատյացության, հակասեմականության, միգրանտների իրավունքների զանգվածային և կոպիտ ոտնահարումների և նման այլ խորը արմատացած խնդիրների հետ, որոնք ընդգրկում են Եվրոպան»,- ասվում է հայտարարության մեջ։
Ամենուր ֆրանսիական հետք փնտրող ադրբեջանցի պաշտոնյաները նշում են, թե «բանաձևը պատրաստվել է Ֆրանսիայի կառավարության դրդմամբ՝ հակաադրբեջանական, իսլամատյաց պատգամավորների կեղծ տեղեկատվության հիման վրա»։
«Եվրախորհրդարանի այս քայլը երկակի ստանդարտների քաղաքականության ևս մեկ վառ օրինակ է և հիմնախնդիրների նկատմամբ ընտրովի մոտեցման ապացույց»,- նշել են ադրբեջանցի պատգամավորները։
Հիշեցնենք՝ Եվրախորհրդարանի պատգամավորները Ստրասբուրգում կայացած ԵԽ լիագումար նիստում բանաձև էին ընդունել, որով կոչ են անում ԵՄ-ին պատժամիջոցներ կիրառել Ադրբեջանի դեմ՝ կապված Լեռնային Ղարաբաղի իրադարձությունների հետ, ինչպես նաև վերանայել համագործակցությունը և նվազեցնել ադրբեջանական գազի ներկրումից կախվածությունը։ Բանաձևին կողմ է քվեարկել 491, դեմ՝ 9, ձեռնպահ՝ 36 պատգամավոր։
Էմմա Չոբանյան
