Պենտագոնը հաստատել է Սիրիայում ԱՄՆ-ի կողմից Թուրքիայի ԱԹՍ-ի խոցումը

ԱՄՆ-ը նախօրեին զինված թուրքական անօդաչու թռչող սարք է խոցել, որը նկատվել է Սիրիայում տեղակայված իր զորքերի մոտ։ Այս մասին ասվում է Պենտագոնի հայտարարության մեջ։ Նշենք, որ սա առաջին դեպքն է, երբ Վաշինգտոնը խոցում է ՆԱՏՕ-ի դաշնակից Թուրքիայի ինքնաթիռը, գրում է Duvar-ը։

Թուրքիայի ազգային հետախուզական գործակալությունը Սիրիայում հարվածներ է հասցնում քուրդ զինյալների թիրախներին անցյալ շաբաթավերջին Անկարայում տեղի ունեցած պայթյունից հետո։ Ըստ Թուրքիայի ՊՆ-ի՝ հոկտեմբերի 5-ի գիշերը թուրքական ռազմական օդային հարվածները Սիրիայի հյուսիսում ոչնչացրել են քուրդ զինյալների 30 թիրախ, այդ թվում՝ նավթահոր, պահեստարան և ապաստարաններ, ինչպես նաև «վնասազերծել» են բազմաթիվ զինյալների։

Պենտագոնի խոսնակ, բրիգադի գեներալ Փեթ Ռայդերի տեղեկացմամբ՝ հոկտեմբերի 5-ի առավոտյան տեսել են, որ թուրքական անօդաչուներն ավիահարվածներ են հասցնում սիրիական Հասաքա քաղաքում՝ ամերիկյան զորքերից շուրրջ մեկ կմ հեռավորության վրա: Մի քանի ժամ անց թուրքական անօդաչուն մոտեցել է ամերիկյան զորքերից կես կիլոմետրից պակաս հեռավորության վրա, համարվել է սպառնալիք և խոցվել F-16-ի կողմից:

«Մենք ոչ մի նշան չունենք, որ Թուրքիան միտումնավոր թիրախավորել է ամերիկյան զորքերը»,- հավելել է Ռայդերը։

ԱՄՆ պաշտպանության նախարար Լլոյդ Օսթինն էլ միջադեպի մասին խոսել է Թուրքիայի ՊՆ ղեկավար Յաշար Գյուլերի հետ։ Ռայդերն այս զրույցն «արդյունավետ» է անվանել։

Էմմա Չոբանյան