Քաղաքականություն
06.10.2023 | 10:23
Թուրքիայի Արտաքին գործերի նախարարությունը դատապարտել ու «անպատասխանատու և անգրագետ» է անվանել Ղարաբաղի շուրջ իրավիճակի և Ադրբեջանի հետ հարաբերությունների վերաբերյալ ավելի վաղ Եվրախորհրդարանի (ԵԽ) կողմից ընդունված բանաձևը։
«Եվրախորհրդարանի կողմից ընդունված այս ոչ պարտադիր բանաձևն անպատասխանատվության, կողմնակալության և անտեղյակության խորհրդանիշ է: Մենք դատապարտում ենք այս բանաձևը, որը հիմնված է մի խումբ ԵԽ անդամների հռետորաբանության վրա, ովքեր պոպուլիստ են, արտահայտում են խտրական տեսակետներ և երկար տարիներ անհիմն մեղադրանքներ են ներկայացրել Թուրքիայի հասցեին»,- ասված է երկրի ԱԳՆ հաղորդագրության մեջ։
Հիշեցնենք, որ Եվրախորհրդարանը երեկ բանաձև էր ընդունել ԵՄ-ի և Ադրբեջանի միջև հարաբերությունները վերանայելու և Լեռնային Ղարաբաղում տիրող իրավիճակի հետ կապված պատժամիջոցներ սահմանելու անհրաժեշտության մասին։ Այս առումով Եվրահանձնաժողովից պահանջվում է «արագ վերանայել» էներգետիկայի ոլորտում Բաքվի հետ ռազմավարական գործընկերությունը՝ «Ադրբեջանի կողմից միջազգային պարտավորությունները խախտելու համար»։ Խորհրդարանականները նաև կոչ են անում ԵՄ-ին և անդամ երկրներին՝ անհատական պատժամիջոցներ սահմանել Ադրբեջանի կառավարության անդամների դեմ։
