24.11.2024 | 14:02
Ավտոմեքենայի դուռը փակվել է, 1-ամյա երեխան մնացել է ներսում․ օգնել են փրկարարները
Հաջիևը հայտարարել է, թե Ադրբեջանի եվրոպացի գործընկերներն ընկնում են «հակաադրբեջանական քարոզչության» ազդեցության տակ
Քաղաքականություն
05.10.2023 | 20:42
Ադրբեջանի նախագահի օգնական Հիքմեթ Հաջիևն Al-Jazeera-ին տված հարցազրույցում ասել է, թե «երբեմն Ադրբեջանի որոշ եվրոպացի գործընկերներ ընկնում են Ադրբեջանի դեմ անհիմն քարոզչության ազդեցության տակ»։
«Մեր միջազգային գործընկերները, հետ նայելու փոխարեն, պետք է նայեն ապագային՝ ի՞նչ հեռանկարներ կան։ Նույնը վերաբերում է մեր եվրոպացի գործընկերներին, այդ թվում՝ Եվրամիությանը։ Երբեմն տեսնում եմ, որ մեր որոշ եվրոպացի գործընկերներ ընկնում են անհարկի և անհիմն քարոզչության ազդեցության տակ։ Սա չպետք է տեղի ունենա: Նրանք չպետք է այդպես վարվեն, այլ պետք է նպաստեն խաղաղության օրակարգին»,- հայտարարել է նա։
Խոսելով Ադրբեջանի և Հայաստանի միջև խաղաղության հաստատման միջազգային հարթակների մասին՝ նա նշել է, թե Ռուսաստանը, օրինակ, պատմական կապեր ունի երկու երկրների հետ, ուստի այս հարթակը բավականին կարևոր է։ Իր հերթին, ԱՄՆ-ը, մոսկովյան հարթակին զուգահեռ, Վաշինգտոնում խաղաղության պայմանագրի քննարկումների հարթակ է տրամադրել․ «Եվ ես կարծում եմ, որ մենք կարևոր առաջընթաց ենք գրանցել»:
«Ադրբեջանին խաղաղություն է պետք, տարածաշրջանին խաղաղություն է պետք։ Ուստի, Ադրբեջանի առաջին ուղերձը տեղի հայերին [խոսքը Արցախի հայերի մասին է] այն է, որ Ադրբեջանը խաղաղության և խաղաղ ինտեգրման ուղերձ է բերում»,-ասել է Հաջիևը։
Էմմա Չոբանյան
