20.06.2026 | 00:21
Կոտրված ապակիներ, մարմնական վնասվածքներ, խցանումներ․ ինչ վնաս է հասցրել կարկուտը Գյումրիում. ՏԵՍԱՆՅՈՒԹ
Անկարան ողջունել է Գրանադայի բանակցություններին մասնակցելուց հրաժարվելու՝ Ալիևի որոշումը
Քաղաքականություն
05.10.2023 | 16:32
Անկարայում ողջունում են, որ Ադրբեջանի նախագահ Իլհամ Ալիևը հրաժարվել է մասնակցել Գրանադայում այսօր նախատեսված բանակցություններին։ Մասնավորապես, Թուրքիայի նախագահ Ռեջեփ Թայիփ Էրդողանի գլխավորած «Արդարություն և զարգացում» կուսակցության փոխնախագահ, մամուլի խոսնակ Օմեր Չելիքը հայտարարել է, որ չի բավարարվել հանդիպմանը Թուրքիայի մասնակցության պայմանը։
«Պարոն Ալիևը չեղարկել է իր այցը Իսպանիա, քանի որ հանդիպմանը Թուրքիայի մասնակցության պայմանը չի ընդունվել։ Մենք ցանկանում ենք հայտնել, որ գնահատում ենք սա։ Պատկերացնու՞մ եք՝ կմասնակցեն Ֆրանսիան, Գերմանիան, ԵՄ-ն, Հայաստանը, հրավիրում են Ադրբեջանին, բայց Թուրքիան ներկա չէ։ Հարցերի մասին խոսվելու է առանց մեր նախագահի»,-ասել է Չելիքը։
Նա, սակայն, մոռացել է նշել, որ այս ձևաչափով նախկինում ևս հանդիպումներ եղել են, և որ Թուրքիան այդ ձևաչափի անդամ չէ։
Հավելենք, որ այսօր Գրանադայում Եվրոպական քաղաքական համայնքի համաժողովի շրջանակում նախատեսվում էր ՀՀ վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, ԵՄ Խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը, սակայն Բաքուն հրաժարվել է մասնակցել նախապես համաձայնեցված բանակցություններին։
Ի դեպ, Էրդողանը ևս չի մեկնել Գրանադա՝ Եվրոպական քաղաքական համայնքի գագաթնաժողովին։ Ըստ մամուլի հրապարակումների՝ նա առողջական խնդիրներ ունի։
Էմմա Չոբանյան
