Հայտնի են ձմեռային զորակոչի և զորացրման օրերը

Հոկտեմբերի 23-ից մինչև 2024 թվականի հունվարի 31-ը Պաշտպանության նախարարությունում մեկնարկում է ձմեռային զորակոչը։ ՀՀ զինված ուժերը կհամալրեն այն անձինք, որոնց 18 տարեկանը լրանում է մինչև 2023 թվականի դեկտեմբերի 31-ը ներառյալ, ինչպես նաև այն քաղաքացիները, որոնց շարքային կազմի պարտադիր զինվորական ծառայության զորակոչից նախկինում տրված տարկետումը դադարում է մինչև 2023 թվականի դեկտեմբերի 31-ը ներառյալ:

Ներկայացված նախագծով պաշտպանության նախարար Սուրեն Պապիկյանին հանձնարարվում է Առողջապահության նախարարության հետ համագործակցությամբ ապահովել 2023 թվականի ձմեռային զորակոչի նախապատրաստական, քաղաքացիների առողջական վիճակի հետազոտման և բժշկական փորձաքննության, ինչպես նաև զինված ուժերի համալրման աշխատանքների կազմակերպման ընթացքում կորոնավիրուսի (COVID-19) տարածման և զինված ուժեր ներթափանցման դեպքերի կանխարգելման անհրաժեշտ միջոցառումների իրականացումը։

«Իրավասու մարմիններին հանձնարարել՝ հայտարարված զորակոչին Պաշտպանության նախարարության զորակոչային և զորահավաքային համալրման ծառայություն և նրա տարածքային ստորաբաժանումներ չներկայացած կամ քրեական պատասխանատվության կանչված և հետախուզման մեջ գտնվող զորակոչիկների վերաբերյալ տվյալներ ստանալուց հետո, նրանց նկատմամբ կիրառել աշխատանքային, տնտեսական ու այլ ոլորտներում՝ ՀՀ օրենքով նախատեսված սահմանափակումներ և գտնվելու վայրի մասին անհապաղ իրազեկել իրավասու պետական մարմիններին, ինչպես նաև ապահովել ՀՀ զորակոչի ենթակա քաղաքացիների ներկայանալը Պաշտպանության նախարարության զորակոչային և զորահավաքային համալրման ծառայություն և դրա տարածքային ստորաբաժանումներ»,- նշվում է նախագծում։

Սահմանվել է նաև ձմեռային զորացրման օրերը։ Ըստ պաշտպանական գերատեսչության ներկայացրած նախագծի՝ զինծառայողների զորացրումը կիրականացվի 2023 թվականի դեկտեմբերի 20-ից մինչև 2024 թվականի հունվարի 31-ը ներառյալ։

Ռոզա Վարդանյան