Ալիևի ներկայացուցիչը հայտարարել է, թե Բաքուն չի հավակնում «Զանգեզուրի միջանցքին» և այն ճանաչում է Հայաստանի տարածք

Արցախում էթնիկ զտումներ իրականացնելուց և հայաթափումից հետո Ադրբեջանի իշխանությունները նոր  քարոզչական ուղեգիծ են որդեգրել։ Մասնավորապես, տարբեր պաշտոնյաներ հարցազրույցներում հայտարարություններ են անում, թե Բաքուն, իբր, Հայաստանի նկատմամբ տարածքային պահանջներ չունի և չի պատրաստվում ռազմական ճանապարհով բացել գոյություն չունեցող «Զանգեզուրի միջանցքը»։

Մասնավորապես, Ադրբեջանի նախագահի հատուկ հանձնարարություններով ներկայացուցիչ, դեսպան Էլչին Ամիրբեկովը թեմային անդրադարձել է՝ պատասխանելով ԱՄՆ Հադսոնի ինստիտուտի Մերձավոր Արևելքի խաղաղության և անվտանգության կենտրոնի տնօրեն Մայքլ Դորանի և ինստիտուտի աշխատակից Լյուկ Քոֆիի հարցերին։

Նշենք, որ Մայքլ Դորանն ու Լյուկ Քոֆին ԱՄՆ-ում Ադրբեջանի լոբբիստներն են, ֆինանսավորվում են Բաքվի իշխանությունների կողմից։

«Ինչ վերաբերում է «Զանգեզուրի միջանցքին», ապա հայերը սխալ են մեկնաբանել մեր պատկերացումն այն մասին, թե ինչ է նշանակում այդ միջանցքը մեզ համար»,- ասել է Ամիրբեկովը։

Նա հավելել է, թե ադրբեջանական կողմը չի հավակնում այդ տարածքներին և ճանաչում է դրանք որպես Հայաստանի ինքնիշխան տարածք։

«Այլ խնդիր է, թե ինչպես են ապահովելու դրա անվտանգությունը: Սա առանձին հարց է, քանի որ հրադադարի մասին եռակողմ հայտարարության համաձայն՝ տեղաշարժի անվտանգությունն ապահովելու են ռուս սահմանապահները: Հիմա, կարծես թե, Հայաստանը վերանայում է այդ պարտավորությունը, քանի որ նրանց համար ռուսներին տրված այս դերն այլևս հարմար չէ»,- ասել է Ամիրբեկովը։

Էմմա Չոբանյան