26.06.2026 | 16:34
Ամերիաբանկն ՕՊԵԿ-ի Միջազգային զարգացման հիմնադրամից ներգրավել է 50 միլիոն ԱՄՆ դոլար՝ խթանելու ՓՄՁ ֆինանսավորումը Հայաստանում
Գրանադայի հանդիպումից հրաժարվելուց հետո Ալիևը հեռախոսազրույց է ունեցել Շոլցի հետ
Քաղաքականություն
05.10.2023 | 11:53
Գերմանիայի կանցլեր Օլաֆ Շոլցն ու Ադրբեջանի նախագահ Իլհամ Ալիևը հեռախոսազրույց են ունեցել՝ քննարկելով տարածաշրջանային հարցեր, հայտնում է ադրբեջանական կողմը։
Նշվում է, որ հեռախոսազրույցը տեղի է ունեցել գերմանական կողմի նախաձեռնությամբ։
«Հեռախոսազրույցի ընթացքում մտքեր են փոխանակվել տարածաշրջանային խնդիրների շուրջ»,- ասվում է հաղորդագրության մեջ։
Նշվում է, որ Շոլցը Գերմանիայի աջակցությունն է հայտնել տարածաշրջանի երկրների տարածքային ամբողջականությանն ու ինքնիշխանությանը։ Գերմանիայի կանցլերն ընդգծել է, որ Բեռլինն աջակցում է բրյուսելյան գործընթացին և բարձր է գնահատել Ադրբեջանում ՄԱԿ-ի մշտական համակարգող Վլադանկա Անդրեևայի գլխավորած առաքելության այցը Լեռնային Ղարաբաղ։
Ալիևն ընդգծել է Ադրբեջանի հավատարմությունը տարածաշրջանում խաղաղության օրակարգին և աջակցությունը բրյուսելյան գործընթացին՝ Եվրոպական խորհրդի ղեկավար Շառլ Միշելի մասնակցությամբ։ Այնուհետև Ալիևը խոսել է «Արցախի հայերին հումանիտար օգնություն ցուցաբերելու մասին»։
Հավելենք, որ այսօր Գրանադայում Եվրոպական քաղաքական համայնքի համաժողովի շրջանակում նախատեսվում էր ՀՀ վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, ԵՄ Խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը, սակայն Բաքուն հրաժարվել է մասնակցել։
Էմմա Չոբանյան
