16.05.2026 | 13:49
Թանգարանային գիշերը՝ Մատենադարանում․ միջոցառումների ցանկը
Էրդողանի այցը Գրանադա չեղարկվել է․ նա կրկին առողջական խնդիրներ ունի
Քաղաքականություն
04.10.2023 | 14:33
Թուրքիայի նախագահ Ռեջեփ Թայիփ Էրդողանի՝ այսօր կայանալիք իշխող «Արդարություն և զարգացում» կուսակցության նիստին մասնակցությունը և հոկտեմբերի 5-ին Իսպանիայի Գրանադա քաղաքում հանդիպումները չեղարկվել են՝ նրա առողջական խնդիրների պատճառով, գրում են թուրքական լրատվամիջոցները։
Հաղորդվում է, որ Էրդողանը չի մասնակցի հոկտեմբերի 5-ին Իսպանիայում կայանալիք Եվրոպական քաղաքական համայնքի 3-րդ գագաթնաժողովին, թեև անցած շաբաթ հաստատվել էր նրա մասնակցությունը։
Նշվում է, որ Էրդողանը երեկ երեկոյան հիվանդացել է հարբուխով և բժիշկների խորհրդով չեղարկել է Գրանադա այցը։
Հավելենք, որ Էրդողանն առողջական խնդիրների պատճառով վերջերս հաճախ է տարբեր հանդիպումներ բաց թողնում։
Նման իրավիճակ էր նաև Թուրքիայի նախագահական ընտրությունների քարոզարշավի ժամանակ։ Մասնավորապես, նախընտրական շրջանում Kanal 7-ի և Ulke TV-ի համատեղ ուղիղ եթերում հարցազրույցի ժամանակ Էրդողանի ինքնազգացողությունը վատացել էր, ինչի պատճառով հեռարձակումը դադարեցվել էր։ Եթեր վերադառնալուն պես Էրդողանն անդրադարձել էր իր առողջական խնդիրներին՝ նշելով, որ ինտենսիվ քարոզարշավի պատճառով ստամոքսի հետ կապված խնդիրներ ունի։ Այնուհետև մի քանի օրով նա չեղարկել էր բոլոր միջոցառումներն ու չէր ներկայանում հանրությանը։ Թուրքիայի առողջապահության նախարար Ֆահրեթթին Քոջան հայտարարել էր, թե Էրդողանի մոտ «գաստրոէնտերիտային վարակ» է։
Էմմա Չոբանյան
