12.06.2026 | 01:05
ԱԱ-2026․ Երեք կարմիր քարտ ու տանտերերի հաղթանակ՝ բացման խաղում․ ՏԵՍԱՆՅՈՒԹ
ՌԴ-ում «Առաջին ալիքի» նախկին աշխատակցուհի Մարինա Օվսյաննիկովային հեռակա կարգով 8,5 տարվա ազատազրկման են դատապարտել
Քաղաքականություն
04.10.2023 | 17:31
Մոսկվայի Բասմանի դատարանը հեռակա կարգով 8,5 տարի ժամկետով ազատազրկման է դատապարտել «Առաջին ալիքի» «Վրեմյա» հաղորդաշարի նախկին խմբագիր Մարինա Օվսյաննիկովային՝ նրան մեղավոր ճանաչելով «ռազմական կեղծիքներ» տարածելու մեջ։ Օվսյաննիկովան չի ընդունել մեղքը և հայտարարել է, որ իր ոչ մի բառից չի հրաժարվել, գրում է BBC-ի ռուսական ծառայությունը։
Մեղադրող կողմը Օվսյաննիկովային, որը հայտնի է դարձել «Առաջին ալիքի» ուղիղ եթերում հակապատերազմական ակցիայից հետո, պահանջել է դատապարտել մեկ տարով ավելի՝ 9,5 տարվա ազատազրկման։
Նրան մեղադրել են քաղաքական ատելության հիման վրա ռուսական բանակի մասին «ֆեյքեր» տարածելու մեջ (ՌԴ Քրեական օրենսգրքի 207.3 հոդվածի 2-րդ մասի «ե» կետ): Քրեական գործի առիթը 2022 թվականի հուլիսին նրա անցկացրած պիկետն էր։
Հեռուստաալիքի եթերում ակցիայից հետո Օվսյաննիկովան կանգնել էր Կրեմլի դիմաց գտնվող Սոֆիյսկայա ամբարտակի վրա՝ պաստառով, որի վրա Ուկրաինայում սպանված երեխաների լուսանկարներ էին և գրություն, որում ՌԴ նախագահին «մարդասպան» էր անվանում։
«Մահացել է 352 երեխա, էլ քանի՞ երեխա պետք է մեռնի, որ դու կանգ առնես», – գրված էր պաստառի վրա։
Մեղադրող կողմի կարծիքով՝ Օվսյաննիկովան այս գործողություններով ռուսական զինված ուժերի նկատմամբ «ստեղծել է հասարակության մեջ բացասական վերաբերմունքի ձևավորման իրական սպառնալիք» ։
Օվսյաննիկովայի նկատմամբ խափանման միջոց է ընտրվել տնային կալանքը, սակայն կարճ ժամանակ անց նա դստեր հետ լքել է Ռուսաստանը։
