07.10.2026 | 23:19
Հայաստանը ՄԱԿ-ում ընդգծել է զարգացող երկրների համար միջազգային աջակցության և ֆինանսավորման կարևորությունը
Իրանի ԳՇ պետը Հայաստանի և Ադրբեջանի սահմանին դիտորդներ ուղարկելու պատրաստակամություն է հայտնել
Քաղաքականություն
04.10.2023 | 13:08
Իրանի Զինված ուժերի գլխավոր շտաբի պետ, գեներալ-մայոր Մոհամմադ Հոսեյն Բաղերին Հայաստանի ԱԽ քարտուղար Արմեն Գրիգորյանի հետ հանդիպմանը նշել է, որ Թեհրանը պատրաստ է նպաստել կովկասյան տարածաշրջանում լարվածության թուլացմանը, փոխանցում է Mehr-ը։
Նա նշել է, որ զարգացումները Հարավային Կովկասում ազդում են տարածաշրջանի անվտանգության վրա։ Բաղերին ընդգծել է, որ այս տարածաշրջանում լարվածության շարունակումը չի բխում Հայաստանի, Ադրբեջանի և տարածաշրջանի մյուս երկրների շահերից։ Նա նաև կոչ է արել միջոցներ ձեռնարկել՝ տարածաշրջանում լարվածությունը թուլացնելու և վեճերը լուծելու համար։
Հայտնելով Հայաստանի և Ադրբեջանի սահմաններին դիտորդներ ուղարկելու՝ Իրանի պատրաստակամությունը՝ Բաղերին ընդգծել է, որ որևէ երկրի պաշտպանունակության բարելավման հետևում չպետք է լինի ագրեսիվ նպատակ կամ մտադրություն։
«Տարածաշրջանում խաղաղությունն ու անդորրը բխում են բոլոր երկրների շահերից, և տարածաշրջանի անվտանգությունը պետք է ապահովեն տարածաշրջանի երկրները, իսկ արտատարածաշրջանային ուժերի ներկայությունը հակասում է տարածաշրջանի խաղաղությանը»,- ասել է նա։
Բաղերին անդրադարձել է ավելի վաղ անցկացված հայ-ամերիկյան զորավարժություններին՝ նշելով, որ արտատարածաշրջանային ուժերի առկայությունն անկայունություն կառաջացնի։
Հիշեցնենք, որ Արմեն Գրիգորյանն ավելի վաղ հանդիպել էր նաև Իրանի նախագահ Էբրահիմ Ռաիսիին, ԱԳ նախարար Հոսեյն Ամիր Աբդոլահիանին, ինչպես նաև այլ բարձրաստիճան պաշտոնյաների։
Էմմա Չոբանյան
